Raporti i Reuters: SHBA ka asgjësuar vetëm një të tretën e arsenalit raketor të Iranit

Sipas një raporti të Reuters, bazuar në të dhëna të inteligjencës amerikane, Shtetet e Bashkuara të Amerikës kanë shkatërruar vetëm rreth një të tretën e arsenalit të raketave dhe dronëve të Iranit. Kjo vjen pas një muaji lufte që synonte degradimin e aftësive balistike të Teheranit.

Raporti, i cili citon pesë persona të njohur me inteligjencën amerikane, sugjeron se ndërsa shumica e raketave të Iranit janë aktualisht të paarritshme, vendi ende posedon një stok të konsiderueshëm. Përveç një të tretës së shkatërruar, një tjetër e tretë mendohet të jetë dëmtuar ose fshehur në tunele dhe bunkerë nëntokësorë, vlerësim i ngjashëm edhe për dronët. Kjo e dhënë bie në kundërshtim me deklaratën e Donald Trump të enjten, i cili tha se Teheranit i kishin mbetur “shumë pak raketa”, si dhe me deklaratat e zyrtarëve të tjerë amerikanë se lufta kishte eliminuar aftësitë balistike të Iranit.

Zyrtarët iranianë e shohin programin e tyre të raketave balistike si një mjet kyç parandalues, veçanërisht kundrejt superioritetit ushtarak të SHBA-së dhe Izraelit, i cili e konsideron këtë arsenal si kërcënim të drejtpërdrejtë. Gjatë muajit të fundit, Irani ka përdorur raketa balistike dhe dronë me efekte shkatërruese, duke goditur Izraelin dhe infrastrukturën kyçe energjetike e publike në Gjirin Persik, duke shkaktuar dëme të mëdha në ekonominë globale.

SHBA-ja dhe Izraeli kanë deklaruar se degradimi i kapacitetit balistik të Iranit është një nga qëllimet kryesore të luftës. Uashingtoni ka dislokuar mijëra trupa shtesë në Lindjen e Mesme, ndërsa administrata shqyrton një operacion tokësor në ishullin Kharg për rihapjen e ngushticës së Hormuzit. Trump theksoi se edhe 1% e raketave të mbetura është e papranueshme, pasi një raketë mund të godasë një anije miliardëshe.

Izraeli i ka bërë depot dhe lëshuesit e raketave balistike objektiva kryesore të fushatës së tij ajrore, duke pretenduar se ka “neutralizuar” 335 ose 70% të lëshuesve të Teheranit. Irani i ka shpërndarë lëshuesit në të gjithë vendin për të shmangur zbulimin. Edhe pse numri i lëshimeve ka rënë me vazhdimin e bombardimeve, raketat kanë arritur ende të godasin Izraelin dhe Gjirin Persik, ndërsa stoqet e interceptorëve po mbarojnë. Izraeli, SHBA-ja dhe shtetet e Gjirit kanë shpenzuar miliarda për të bllokuar breshëritë iraniane.

Një zyrtar amerikan, në kushte anonimiteti, sugjeroi se do të ishte e pamundur të vlerësohej stoku i raketave të Iranit, pasi pjesa më e madhe ruhej nëntokë. “Nuk e di nëse do të kemi ndonjëherë një numër të saktë,” tha ai. Të enjten, Irani lëshoi 15 raketa dhe 11 dronë drejt Emirateve të Bashkuara Arabe. Sekretari amerikan i Mbrojtjes, Pete Hegseth, pranoi se rrjeti i gjerë i tuneleve krijonte një sfidë shtesë, por theksoi se ushtria amerikane do të vazhdonte “metodikisht, pamëshirshëm dhe në mënyrë dërrmuese.”

Marrë nga The Guardian