Reagon pronari Kastrati: Nuk e njoh Shullazin, nuk jam shantazhuar!

Administratori i kompanisë së hidrokarbureve, “Kastrati group”, Shefqet Kastrati mohoi të jetë shantazhuar nga Emiliano Shullazi apo njerëz të tjerë nga banda e tij. Në një reagim për mediat, Shefqet Kastrati distancohet totalisht nga ngjarja dhe thotë se mohon njohjen me Shullazin dhe se nuk është kontaktuar në asnjë moment nga policia apo prokuroria, pavarësisht se emri i tij është në dosjen e prokurorisë. Shefqet Kastrati kërkon nga prokurori i Përgjithshëm të nisë hetimet për atë që e quan “fabrikim” të dokumentit të prokurorisë dhe përgënjeshtrimin në media. Në fakt, media publikoi përmbajtjen e dokumentit të prokurorisë, ku përveç Kastratit janë përmendur edhe biznesmenë të tjerë, që sipas prokurorisë janë kërcënuar nga Shullazi.      

Reagimi i Shefqet Kastratit për prokurorinë dhe lajmin në media

Duke u nisur nga publikimi në disa portale dhe media elektronike më dt. 19.04.2016, të një lajmi referuar një shkrese të Prokurorisë pranë Gjykatës së Shkallës së Parë për Krimet e Rënda, Tiranë, ku përmëndet emri i Z. Shefqet Kastrati dhe kompania “Kastrati Group”, ju bëjmë me dije se: Lajmi i publikuar dhe përmbajtja e shkresës së cilës i referohet, jane gënjeshtëra dhe nuk kanë të bëjnë me Z. Shefqet Kastrati, kompaninë Kastrati Group si dhe asnjë person tjetër që ka lidhje me ata. Me përgjegjësi të plotë qytetare dhe morale deklarojmë se nuk kemi pasur asnjë kontakt, bisedë, presion apo shantazh nga asnjë person, madje personat e përmëndur në lajm si Emiljano Shullazi etj, nuk i kemi njohur kurrë. As prokuroria, policia dhe asnjë strukturë tjetër ligjzbatues nuk është investuar nga ne dhe as nuk na ka kërkuar, pyetur apo verifikuar rreth këtij aludimi të pavërtetë. Përfshirja dhe implikimi në mënyrë të papërgjegjshme e Presidentit te Kastrati Group, nga institucione apo media te caktuara, pa asnjë lidhje me të vërtetën, pa fakte, ankesë, pyetje dhe verifikime, na bëjne të dyshojmë për veprime tendencioze të sponsorizuara nga konkurrenca e pandershme, me synim dëmtimin e imazhit dhe reputacionit të kompanisë dhe drejtuesit të saj. I kerkojmë me forcë Prokurorit të Përgjithshëm të nisi menjëhërë hetimet rreth mënyrës së fabrikimit dhe shpërndarjes së kësaj shkrese dhe këtij lajmi të pavërtetë. Ftojmë çdo organ ligjzbatues të bëjë publike provat dhe faktet mbi të cilat pretendohet, në të kundërt ju kërkojmë të bëni menjëherë përgënjeshtrimin. Në rast të mosreagimit, do i drejtohemi organeve gjyqësore për të kërkuar zhdëmtimin e dëmit të shkaktuar si pasojë e dëmtimit të imazhit dhe personalitetit. Duke garantuar opinionin publik, klientët dhe bashkëpunëtorët tanë për integritetin, seriozitetin dhe korrektesinë tonë, ju kërkojmë mediave që e kanë publikuar të përgënjeshtrojne këtë lajm dhe të gjitha mediave të publikojnë këtë deklaratë. Me besimin në etikën tuaj profesionale dhe në respektim të së drejtës sone ligjore dhe kushtetuese, mbetemi në pritje të reagimit tuaj.