Sherri në PD çon ujë te mulliri i kryeministrit Rama

Nga Herion Mesi-

Në PD nuk ka më qetësi. Palët janë ngërthyer keq përballë njeri tjetrit. Futja në lojë e ish-deputetit Agron Shehaj ka komplikuar paksa Bashën, ndonëse prapë Luli do fitojë me 13 qershor, por duket si një lojë përfekte për të spostuar vëmendjen nga zgjedhjet e 25 prillit, ku Rilindja kreu masakren me të madhe të 30 vitëve, natyrisht pas atyre të 26 majit 1996.

Nga ana tjetër, Edi Rama rri e vështron rremujën në kampin e selisë blu, duke dalë para medias si babaxhan që nuk fut duart në zënken e tyre dhe flet për “komunikim të ri me opozitën” dhe për “horizonte te reja'” për Shqipërinë.

Dhe pse të mos veprojë kështu!

Zgjedhjet i mori, PD-ja në vend që të ngrinte popullin para kutive për rinumerim dhe rivotime në disa qarqe problematike, filloi gjoja zgjedhjet në PD.

A thua se demokratët donin zgjedhje në selinë blu dhe se aty e kanë merakun e jetës së tyre!

Ish-lideri demokrat Berisha tha dje se nuk duhej zgjedhje në PD kaq herët pa mbaruar me zgjedhjet e manipuluara. Por tashmë e gjithë media proqeveritare e ka fokusuar me lejen e Endri Fugës (fugizmi) krejt drejtimin e propogandës nga Sali Berisha, sikur ky mbetet problemi kryesor në Shqipëri.

Natyrisht që ish-kryeministri duhet hetuar si gjithë të tjerët.

Në PD, duke e parë se loja Rama-Basha vazhdon që prej 18 majit 2017, kanë filluar denoncimin publik. Dje ish-presidenti dhe tashmë në rolin e kryetarit të Këshillit Kombëtar të PD-së, Bujar Nishani sulmoi hapur Lulzim Bashën, duke e akuzuar si pjesë planit Rama-Soros, që amerikanët të dënonin ish-kryeministrin Berisha.

Nuk vonoi dhe mbremë vonë, diku afër orës 23.20 doli në status në facebook, Lulzim Basha dhe kundërsulmoi Bujar Nishanin.

Dhe e gjitha kjo çon ujë te “mulliri” i kryeministrit Rama.

Ai tani rri e fërkon duart nga kjo që po ndodh në PD. Ndërkohë KAS bën namin me Rilindjen.