Thirrja e mjekut Sokol Parruca për shpëtimin e artistes së njohur Justina Aliaj: Ju lutem kolegë, shpëtojeni Justinën!

Korona po merr përpara çdo artist dhe qytetar të thjeshtë. Pak ditë më para mori artistin Koço Devole.

Sot artistja e njohur Justina Aliaj ka rezultuar pozitive me koronavirus.

Burime bëjnë me dije se ajo është shtruar në Infektiv dhe ndodhet në gjendje jo shumë të mirë shëndetësore.

Për këtë ka reaguar edhe miku i saj Sokol Parruca, i cili shkruan se Justina po vuan nga mungesa e frymëmarrjes në spitalin Infektiv dhe u bën thirrje publike mjekëve që ta shpëtojnë.

“Justina Aliaj po vuan mungesën e frymëmarrjes në Spitalin Infektiv!

E gjithë vëmendja jonë është tek ti Justi. E di se nuk ke nevoje për kurajë, se ti je tip kurajoze, e ke treguar forcën e karakterit dhe në ditë të tjera të vështira që ke kaluar në jete dhe ia ke dalë.

Dhe sot do ia dalësh! Ti e di, se të gjithë jemi aty me ty, të gatshëm të të japim frymë nga fryma jonë, siç na ke dhënë ti me artin tënd, shpirtin tënd.

Të nderuar mjekë!  

Sot para jush qëndron e shtrirë një heroinë, një aktore e madhe, një artiste e madhe, një njeri i madh, ju lutem, përunjësisht ju lutemi shpëtoni JUSTIN”- shkruan mjeku Parruca, drejtuar kolegëve të tij.

Në foto: Artistja e madhe Justina Aliaj