22 vjeçarja bën injeksion për buzët, përfundon në spital

Një infermiere e re ka shkatërruar jetën me dëshirën e pakontrolluar për mbushjen e buzëve. 22-vjeçarja që punon si infermiere në një spital në Adana, Turqi, ka kryer një ndërhyrje për trashjen e buzëve. Ndërhyrja nuk është kryer tek një specialist i provuar, por tek një parukiere që e prezantonte veten si “specialiste estetike”.”Hurriyet” thotë se Soner Gulnaz i injektoi mbushje të përkohshme tre mujore në buzë infermieres Merve Keles. Por, mbushja u shkri për një javë dhe e reja nuk hoqi dorë, por kërkoi mbushje të përhershme. Në këmbim të një shume të caktuar, “specialistja” i injektoi 26 gjilpëra me silikon. Nuk kaloi më shumë se gjysmë orë dhe buzët iu frynë tej mase, ndërsa të nesërmen përfundoi në spital. “Jam penduar shumë”, thotë 22-vjeçarja, e cila tashmë kërkon pamjen e saj të dikurshme. “Si punonjëse shëndetësie duhej ta kisha pyetur për diplomën. Ka rrezik që tani të mbes pa buzë. Jam penduar shumë.” Ajo thotë se personi që i bëri mbushjen i kishte thënë se “duke qenë se klinika ishte nën rikonstruksion, mbushjen do ta bënin në shtëpi”, raporton Tv Klan. Tashmë çështja ka kaluar në gjykatë, ku Gulnaz thotë se nuk e ka kryer mbushjen dhe vajzës së dëmtuar do t’i duhet të provojë akuzat. Mjeku Metin Yavuz që po merret me infermieren, tha se ekipi i tij po përpiqej të kuptonte se çfarë lënde është injektuar në buzët e saj. Ai tha se e reja nuk ka rrezik për jetën, por nuk dihet nëse do ta arrijë më pamjen e mëparshme.