Antibiotikët tek të sapolindurit ndikojnë negativisht në rritjen e tyre

Përdorimi i antibiotikëve në ditët e para të jetës së një të porsalinduri, edhe pse në disa raste është i nevojshëm, mund të ketë një efekt negativ në rritje. Kështu bëhet me dije në një studim të botuar në revistën “Nature Communications”, i cili tregon se ky ndikim mund të jetë i lidhur me ndryshimet e florës bakteriale të zorrëve.

Ndikimi i ekspozimit neonatal ndaj antibiotikëve u studiua në 12,422 foshnje të lindura midis viteve 2008 dhe 2010 në Spitalin Universitar finlandez “Turku”. Fëmijët nuk kishin ndonjë anomali gjenetike ose çrregullime kronike që ndikonin në rritje. Antibiotikët u morën brenda 14 ditëve të para të jetës në 1,151 (9.3%) të porsalindurve të studiuar. Studimi tregoi se fëmijët meshkuj të cilët kishin qenë të ekspozuar ndaj trajtimit me antibiotikë ishin dukshëm më të shkurtër midis moshës 2 dhe 6 vjeç, ndërsa kjo nuk u pa tek vajzat. Për të dy gjinitë, megjithatë, përdorimi i hershëm i antibiotokëve, por pas fazës neonatale u shoqërua me një rritje të masës dhjamore.

Rezultatet u konfirmuan më pas në një testim tjetër prej 1,700 fëmijëvëe gjermanë dhe tregojnë një lidhje të mundshme midis ekspozimit neonatal ndaj këtyre ilaçeve dhe vonesës në rritjen e këtyre fëmijëve, si rezultat i ndryshimeve të shkaktuara nga antibiotikët në përbërjen e florës së zorrëve.

“Antibiotikët janë ilaçe shumë të rëndësishme dhe shpëtuese të jetës tek foshnjat. Gjetjet tona sugjerojnë, megjithatë, se përdorimi i tyre mund të ketë gjithashtu pasoja të padëshirueshme afatgjata që duhet të merren parasysh,” tha Omry Koren, studiues në universitetin që kreu studimin.