Çeki, notarët mblidhen për të notuar çdo vit në lumin Vltava

Qindra notarë u bënë pjesë e garës së përvitshme në lumin Vltava në qendrën historike të Pragës. Edicioni i 74-të i “Alfred Nikodem” këtë vit u zhvillua nën masa të forta anticovid, teksa notarët nuk I trembeshin ftohjes por virusit.

Qindra njerëz notuan në ujërat e lumit Vltava, më i gjati në Republikën Çeke, në qendrën historike të Pragës. Ky ishte edicioni i shtatëdhjetë e katërt i “Alfred Nikodem”, gara më e vjetër e notit në ujë të ftohtë në vend.

“Alfred Nikodem bëri banjën e parë publike me një grup prej shtatë notarësh me ujë të ftohtë në lumin Vltava në 1923. Në disa vjet, dhjetëra notarë u bashkuan me të,” shpjegoi Tomas Prokop, organizatori i ngjarjes.

Megjithëse për disa, më e keqja nuk është ftohja në ujin me temperaturë rreth 4 gradë celsius:

“Pjesa e vështirë ishte prova Covid, e cila është e dhimbshme, ndërsa  uji është i këndshëm, siç duhet të jetë në Krishtlindje,” tha notari Vladimir Chmela.

Gara u zhvillua nën masa të rrepta anti-COVID-19 në një kohë kur vendi po përjeton një rritje të numrit të rasteve dhe është në  prag të hyrjes në fuqi të kufizimeve të reja dhe një mbyllje të pjesshme.