Pse pasaportat bëhen vetëm me katër ngjyra?

Pasaporta është çelësi i domosdoshëm për të hyrë në një vend tjetër. Ju mund ta keni vërejtur, ndoshta gjatë kohës sa keni pritur në kufi apo aeroport, se ky dokument i rëndësishëm personal zakonisht është vetëm në disa ngjyra të caktuara.

Në përgjithësi, pasaportat janë vetëm të zeza, të gjelbra, të kaltra apo të kuqe, sipas Hrant Boghossian, zëvendës-presidenti i kompanisë Arton Capital, që drejton një databazë të pasaportave të botës.

Sidoqoftë, pasaportat bëhen edhe me nuanca të ndryshme të këtyre katër ngjyrave kryesore, shton ai, sipas “The Independent”. Duke shtuar se ka arsye të ndryshme se pse shtetet përdorin një ngjyrë të caktuar. Përshembull, vendet e Bashkimit Europian kanë pasaporta të kuqe bojëgjaku, kurse ishujt Karaibe kanë pasaportë të kaltër. Sikundër, sipas tij,

mund të ketë edhe arsye gjeografike e politike për përdorimin e një ngjyre të caktuar.

“Disa thonë se e kuqja bojëgjaku, lidhet ngushtë me të kaluarën komuniste, kurse pasaportat e kaltra janë simbolikë e “një bote të re”, shton ai.

Kurse për disa vende, ngjyra e pasaportës mund të lidhet me besimin.

“Shumica e vendeve myslimane e përdorin ngjyrën e gjelbër në pasaportë, për shkak të rëndësisë që ka kjo ngjyrë për religjionin e tyre. E gjelbra thuhet të ketë qenë ngjyra e preferuar e Profetit Muhamet dhe është simbol i natyrës dhe jetës dhe kjo e bën këtë ngjyrë shumë të dashur për islamin e Lindjen e Mesme”, thotë Boghossian.

Sikundër, vende të tjera, kërkojnë ngjyrën që reflekton në karakterin e tyre individual dhe identitetin.

“Pasaportat zvicerane janë të kuqe të qelqta. Kurse Turqia përshembull e ka ndërruar ngjyrën e pasaportës në të kuqe prej gjaku, me shpresën se do t’i bashkohet BE-së”, përfundon ai.