Transmetoi koronavirusin për 70 ditë, e moshuara me leuçemi një rast i rrallë ndërkombëtar

Një 71-vjeçare asimptomatike nga SHBA u zbulua se po transmetonte koronavirusin për 70 ditë pas infektimit të saj. Edhe me sistem imunitar të dobët, shkenëctarët zbuluan se asnjë rast i tillë i transmetueshmërie nuk ishte gjetur kurrë në të gjithë botën.

Një 71-vjeçare në Uashington u zbulua se po transmetonte koronavirusin SARS-CoV-2 për 70 ditë pas infektimit të saj, megjithëse asnjëherë nuk shfaqi as simptomën më të vogël të Covid-19 gjatë kësaj kohe.

Gruaja ka një sistem imunitar të dobët, pasi vuan nga kanceri i gjakut (leuçemia),dhe si rezultat e ka shumë të vështirë të “pastrojë” virusin.

Megjithëse shkencëtarët dyshuan se njerëzit me imunitet të dobësuar në përgjithësi transmetonin koronavirusin zakonisht për më shumë kohë se të tjerët, asnjë rast i tillë i transmetueshmërisë 70-ditore nuk ishte gjetur kurrë ndërkombëtarisht.

Studiuesit, të udhëhequr nga virologu Vincent Munster i Institutit Kombëtar Amerikan të Alergjisë dhe Sëmundjeve Infektive (NIAID), tha se “ndërsa koronavirusi vazhdon të përhapet, më shumë njerëz me çrregullime imunosupresive do të infektohen, dhe kjo është e rëndësishme për të kuptuar sesi SARS-CoV-2 sillet në këto popullata”.

Gruaja u infektua në fund të Shkurtit, në një klinikë ku ishte trajtuar për anemi për shkak të kancerit dhe u diagnostikua me koronavirus në 2 Mars.

Ajo që nga ajo kohë i është nënshtruar dhjetra testeve dhe virusi është zbuluar vazhdimisht në trupin e saj për 105 ditë, ndërsa grimcat e virusit infektiv – të afta për të transmetuar sëmundjen tek të tjerët – u zbuluan për të paktën 70 ditë.

Pamundësia e sistemit të saj imunitar për t’i “përgjigjur” virusit u tregua nga fakti se nuk kishte antitrupa kundër tij në gjakun e saj.

Në mënyrë tipike, pacientët me Covid-19 janë ngjitës për rreth tetë ditë pas infeksionit fillestar. Rasti i mëparshëm më i gjatë ishte një pacient i cili u zbulua të ishte infektiv për 20 ditë.

Mbetet gjithashtu e diskutueshme pse ajo nuk tregoi asnjë simptomë, pavarësisht nga sistemi i saj i dobësuar imunitar, pasi këta pacientë janë në rrezik më të madh të Covid-19 të rëndë me pneumoni.

Virologu Munster tha se kjo mbetet ende “mister”, megjithëse theksoi se mund të jetë një rast i izoluar.