6-mujori, BSH: Bankat me rezultate financiare pozitive

Banka e Shqipërisë bëri të ditur se në gjashtëmujorin e parë 2016, sistemi bankar në vend shënoi rezultate financiare pozitive me fitim në vlerën e afro 5.1 miliardë lekëve, kundrejt 4.3 miliardë lekëve që kishte në 5-mujorin 2016.

Fitimet e bankave këtë vit paraqiten ndjeshëm më të ulëta krahasuar me vitin e kaluar, megjithatë në muajt maj dhe qershor vërehet një përmirësim i ndjeshëm i tyre. Faktori kryesor që ka ulur fitimet e bankave në raport me vitin e kaluar është ekulibrimi i marzheve të interesit.

Gjatë vitit 2015, interesat e depozitave ranë më shumë krahasuar me ato të kredive, çka ju siguroi bankave një rezultat neto nga interesat më të lartë. Siç parashikohej nga bankierët, këtë vit bilanci neto i të ardhurave nga interesat është në rënie.

Kjo ka ndodhur sepse interesat e kredive kanë rënë më shumë në raport me interesat e depozitave, që, qysh vitin e kaluar ishin në nivele shumë të ulët. Ndërkohë, një efekt negativ në bilancet e bankave ka dhënë edhe rritja e shpenzimeve për fondin rezervë të kredive me probleme. Në gjysmën e parë të këtij viti, këto shpenzime paraqiten më të larta krahasuar me të njëjtën periudhë të një viti më parë.