8 Dhjetori/ Ambasada e SHBA: Dita për të nderuar studentët e guximshëm

Ambasada e SHBA në Tiranë ka shpërndarë në profilin e saj zyrtar në Facebook një urim me rastin e 8 Dhjetorit, Ditës së Rinisë.

Sipas ambasadës, sot është një ditë për të nderuar studentët e guximshëm që protestuan kundër diktaturës dhe sollën demokracinë dhe lirinë në Shqipëri.

Më tej, ambasada shton se është për tu vlerësuar që këto 30 vite Shqipëria është bërë anëtare e NATO-s dhe është në rrugë drejt BE-së.

Urimi i plotë i ambasadës së SHBA:

Urojmë të gjithë shqiptarët teksa festojnë Ditën Kombëtare të Rinisë, e cila këtë vit shënon 30 vjetorin e lëvizjes studentore që solli rrëzimin e komunizmit më 8 dhjetor, 1990. Sot është një ditë për të nderuar studentët e guximshëm, të cilët protestuan kundër diktaturës dhe sollën demokracinë e lirinë në Shqipëri, si dhe për të vlerësuar përparimin që është bërë në këta 30 vjet nga Shqipëria, tashmë një anëtare e plotë e NATO-s dhe drejt rrugës së Bashkimit Europian. Është gjithashtu edhe një ditë për t’u siguruar që sakrificat që ata studentë bënë nuk do të harrohen, dhe për të nderuar ata që ende kontribuojnë për një Shqipëri më të mirë. Shtetet e Bashkuara do t’a mbështesin gjithnjë populin shqiptar në këtë udhëtim. #KrahPerKrah