Ahmetaj: FMN ka shprehur optimizëm për rritjen ekonomike

Gjatë konferencës me temë “zhvillimet në tregun bankar”, ministri i Ekonomisë dhe Financave, Arben Ahmetaj tha se borxhi publik nuk është rritur. Sipas tij, gjatë 4 viteve të ardhshme, ekonomia shqiptare do të ketë rritje.

“Kishte një mal me borxhe të pashlyera në vitin 2013. Sot mund të vlerësojmë përpjekjet për të vendosur ekonominë në një ecuri pozitive nga të gjithë aktorët. Pas 4 vitesh ekonomia rritet rreth 4 herë më shumë. Në vitin 2013 ekonomia ishte buzë greminës. Rritja ekonomike është garancia më e mirë në rrugën ku po ecën vendi. Në vitin 2016 investimet e huaja u rritën në 1,1 miliardë dollarë.

Edhe FMN ka shprehur optimizëm për rritjen ekonomike shqiptare. Janë 65 mijë vende të reja pune në vitin 2016. Asnjë qeveri nuk ka të drejtë të rrisë borxhin publik, por ta ulë. Sot niveli i borxhit publik është 71,1 % dhe do të ulet edhe më tej”, tha Ahmetaj. Duke folur për FMN-në, Ahmetaj tha se roli i këtij institucioni do të jetë vetëm monitorues.