Argjentina ëndërron me dyshen Messi-Aguero

Argjentina vijon  përgatitjet për debutimin  në Kupën e Amerikës, në ndeshjen ndaj Paraguait që do të luhet mbrëmjen e kësaj të Shtune. Me mbrritjen në skuadër të Lionel Messit dhe Javier Mascheranos kombëtarja albiceleste e ka të plotë të gjithë grupin e futbollistëve dhe është gati për ta nisur në mënyrën më të mirë kompeticionin që zhvillohet në Kili, me Argjentinën që ka si synim kryesor trofeun e Kupës së Amerikës që për ta do të ishte i 15-ti në histori. Dyshja sulmuese e Argjetinës në sfidën ndaj Paraguait do të përbëhet nga Lionel Messi dhe Sergio Aguero që janë gjithashtu edhe dy shokë shumë të mirë me njëri-tjetrin. El Kun dhe Leo kanë luajtur sëbashku në kombëtare që kur ishin 17-vjec fillimisht në skuadrat e moshave dhe më pas në përfaqësuesen e madhe.

Në cdo kompeticion të rëndësishëm që ka marrë pjesë Argjentina gjatë këtyre 10 viteve ata të dy kanë qenë pjesë e ekipit dhe numërojnë sëbashku 98 gola të realizuar përfshirë këtu edhe ata të shënuar me kombëtaret e moshave. Gerardo Martino beson se me dyshen Messi-Aguero në formacion Argjentina i ka të gjitha kartat në rregull për të fituar  trofeun e Kupës së Amerikës që i mungon që nga viti i largët 1993. Ndaj Paraguait Tata do të ulë në stol Gonzalo Higuain-in dhe Carlos Tevez, ndërkohë në mbështetje të dyshes Messi-Aguero do të jenë Angel Di Maria dhe Javier Pastore. Formacioni i La Selecion në këtë takim pritet të kompletohet me Romeron në portë, Zabaletan, Garay-in, Otamendin dhe Rojon në mbrojtje, si dhe Mascheranon dhe Banegën ose Biglian në qëndër të mesfushës.