Banka Botërore, 1.1 miliardë dollarë kredi të butë Shqipërisë

Shqipëria i shpëton krizës, apo rënies ekonomike ku mund të përfshihej nëse nuk do të ndihmohej nga jashtë. Banka Botërore do të japë 1.1 miliard dollarë për Shqipërinë në 5 vitet e ardhshme. Ka qenë vetë Drejtorja Rajonale e kësaj banke në Tiranë, që ka parashtruar përpara deputetëve të Komisionit të Ekonomisë planin 5 vjeçar të saj, për dhënien e kredive të buta. Tahsin Sayed tha se katër sektorë kryesorë që do të mbështeten janë : energjia, buxheti, turizmi dhe investimet në përmirësimin e klimës së biznesit. Duke përfituar nga prania e përfaqësuesve të lartë të Bankës Botërore opozita ka kërkuar të dijë mendimin e saj lidhur me reformën e qeverisë në sektorin e energjisë elektrike. Banka Botërore ka qenë një nga kredituesit e parë të qeverisë shqiptare për investimet në fushën e energjisë. Madje ajo ka asistuar edhe procesin e privatizimit të Kompanisë së Shpërndarjes dhe doli garante për qeverinë para kompanisë CEZ. Komisioni i Ekonomisë ka miratuar edhe kandidaturën e vetme të ardhur nga qeveria për anëtare në Këshillin Mbikëqyrës të Bankës së Shqipërisë. Duke paraqitur idetë e saj për përmirësimet, që nevojiten në Bankën Qendrore, Denada Prifti theksoi se element i rëndësishëm që duhet të ndryshojë janë transparenca me publikun, duke veçuar sjelljen që bankat tregtare kanë me klientët. Prifti premtoi se nuk aspiron kurrsesi asnjë post ekzekutiv në drejtimin e bankës. Ajo aktualisht punon në Komitetin e Europës, por shtoi se dy herë në muaj do të jetë e pranishme në Shqipëri për të ndjekur nga afër zhvillimet në Bankën Qendrore.