Basha: Trumpetat e Ramës për të luftuar drogën janë mashtrime

Kryetari i Partisë Demokratike, Lulzim Basha ka reaguar në lidhje me drogën e kapur nga autorutetet italiane dhe që dyshohet se vinte nga Shqipëria. Në një deklaratë për mediat, kryeopozitari Basha akuzon kryeministrin Rama, duke thënë se trumpetat e tij për luftën kundër drogës janë mashtrime.

Basha: Ngarkesa prej 2,3 tonë drogë e kapur sot në Itali dëshmon një të vërtetë të hidhur: trumpetat e Edi Ramës për luftë kundër drogës janë vetëm mashtrime me qëllim tulatjen e qytetarëve dhe të komunitetit ndërkombëtar. Ndërkohë ai mbron dhe promovon kokat e krimit të organizuar dhe bashkëpunëtorët e tyre politikë. Ky në fakt është projekti PS+ i shpallur prej tij: PS+drogë+kriminelë+korrupsion.

Basha shkon më tej, duke thënë se Gramoz Ruçit që prej vitit 2005 i është refuzuar hyrja në SHBA për shkak të përfshirjes në krimin e organizuar.

Basha: Kjo faktohet edhe nga promovimi prej tij i Gramoz Rucit të cilit që nga 2005 qeveria amerikane i ka refuzuar hyrjen në SHBA për shkak të përfshirjes në krimin e organizuar dhe trafikun e drogës, dhe Fatmir Xhafës të përfshirë në mbrojtjen e të vëllait të dënuar nga Italia për trafikun ndërkombëtar të kokainës.

Kryedemokrati Basha bën thirrje që të bashkohen të gjithë qytetarë, intelektualë dhe media për të fituar betejën e rrezikut të drogës.

Basha: Opozita do të bëjë çdo përpjekje për ta vënë atë para përgjegjësisë personale për drogën dhe krimin. Por kjo betejë kërkon edhe përpjekjet e medias, intelektualëve dhe të gjithë qytetarëve. Të gjithë duhet të ngremë zërin dhe të ngrihemi kundër rrezikut të drogës para se të jetë vonë.​