Bashën e zuri çadra brenda!  

Nga Nertil Agalliu/ Pak kush mendon sot se Lulzim Basha doli i fituar nga çadra që kishte ngritur në krahë të kërpurdhës së kryeministrisë. Sebepi i marrjes së disa ministrave e shpëtoi Bashën nga mosqëndrimi ende në çadër dhe e nxori akoma më lakuriq pas marrëveshjes së nënshkruar.

I bindur edhe vetë se nuk mund të vinte në pushtet kaq shpejt, Lulzim Basha mori vendimin për të mos fituar zgjedhjet, por partinë, pasi 25 qershori për Bashën, nuk ishte të bëhej kryeministër, por kryetar partie.

Me monologun se do të rrëzojë Edi Ramën, dhe kërkonte qeveri teknike, sot Basha as më pak dhe as më shumë, ka bërë atë që Rama bëri para 2013-s, kur mori drejtimin e Partisë Socialiste.

Nga “Rilindje” në “Republikë”, por me një dallim të madh, Rama e zhvilloi Rilindjen duke i ngrënë kokat një e nga një, ndërsa Basha duket se i ka bërë llogaritë gabim. Ai, me një të rënë të lapsit “zhduku” një grup të tërë parlamentar, dhe jo deputet dosido, por ish ministra dhe drejtues të lartë të historisë së qeverisjes së Partisë Demoktratike.

Marrëveshja i ka kënaqur te dyja palët Ramën dhe Bashën, të parin të fitojë sërish qeverinë, dhe të dytin të fitojë seriozisht partinë.

Por a kanë të drejtë të përjashtuarit të shpërthejnë në këtë mënyrë? Po të shohim listën gjysmake të përgatitur nga Basha, të “vjetrit” apo të kamurit e qeverisjes së shkuarës 8-vjecare, kanë një farë të drejte dhe këtë të drejtë  ja ka dhënë sot vetë Lulzim Basha me përjashtimin që i bëri. Emra me eksperiencë si Bode, Topalli, Patozi, Bregu etj, kanë sot të drejtën e madhe të thonë hapur se ata që janë akuzuar si të pasuruar nga pushteti, nuk janë më shumë se ata të cilët edhe mund të kenë paguar për të qenë në listë, apo nga ata të cilët nuk i lidh asgjë më PD.

Lulzim Basha padashur e zuri çadra brenda, emrat që ai ka listuar për deputetë nuk është se kanë qenë qëndrestar apo themelues, nuk është se ata që la jashtë, kanë qenë të vjetër, apo oligarkë, pasi edhe këta të sotmin duken thuajse njësoj.

Nëse Edi Ramës i ra një qark i tërë nga dekriminalizimi (Lezha), Bashës po i bie lista nga brenda. Vetë Edi Rama tani është më i qetë se kurrë nga marrëveshja e nënshkruar, ai ka dalë mëse i fituar duke i vendosur një kusht për Bashën: Të jap qeverinë, por me një kusht që përballë meje të vish i coptuar dhe i vetëm.

Por çadra mund të jetë dhe fundi i tij politik në krye të PD, rezultati në zgjedhje, por edhe post-zgjedhje pritet të sjellë një shkëputje të madhe të PD-së.

Grupimi i ri që po krijohet do të jetë kundërshtar më i fortë se Edi Rama, për Lulzim Bashën, dhe në fund, i fituari i madh është ai që bënë sehir kur zihen dy vetë, fiton gjithmonë një i tretë.