BE garanton linjën e interkonjeksionit 400 kV Shqipëri-Maqedoni

Bashkimi Evropian garantoi dje mbështetjen financiare për projektin e ndërtimit të linjës elektrike të interkonjeksionit 400 kV mes Shqipërisë dhe Maqedonisë dje në Vjenë (Austri) në takimin mes ministrave të energjisë të Shqipërisë, Bosnje Hercegovinës, Maqedonisë, Kosovës, Malit të Zi dhe Serbisë.
Projekti do të përfshihet në programin IPA 2015 dhe parashikohet që mund të fillojë ndërtimin vitin e ardhshëm kur përfundon linja e interkonjeksionit mes Shqipërisë dhe Kosovës.

Sipas njoftimit të ministrisë së Energjisë dhe Industrisë, takimi u drejtua nga drejtori i Sekretariatit të Komunitetit të Energjisë, Janez Kopaç, me prezencën e Komisioneri Evropian për Fqinjësinë e mirë dhe Zgjerimin, Johannes Hahn. Shqipëria u përfaqësua nga ministri i Energjisë dhe Industrisë, Damian Gjiknuri, në cilësinë edhe të drejtuesit të Presidencës së radhës në Sekretariatin e Komunitetit të Energjisë.
Ministrat miratuan një listë të shkurtuar të projekteve prioritare të investimit, që do të përfshihen në programin IPA 2015, pjesë e së cilës është dhe ndërtimi i linjës së interkonjeksionit, që lidh Shqipërinë me Maqedoninë.

Gjashtë vendet ballkanike shprehën pëlqimin e tyre për krijimin e një tregu rajonal të energjisë dhe Këshillave Kombëtar të Investimeve. Në kuadër të deklaratës u la e hapur mundësia që lista e projekteve me interes për Komunitetin e Energjisë të mund të përditësohet në vitin 2016, ndërsa vendet do të marrin një sërë masash për të ju përgjigjur kërkesave të Komunitetit të Energjisë për një treg të hapur, konkurues, rregullator të pavarur.

Ministri Gjiknuri njohu të pranishmit me hapat që po ndërmerr Shqipëria në kuadër të reformës në sistemin energjitik dhe projektet e lidhjes me linjat e transmetimit me vendet fqinje si ajo me Kosovën që po ndërtohet dhe shumë shpejt linja me Maqedoninë.
“Bashkimi Evropian mund të jetë mbështetës për vende si ne dhe janë projektet e infrastrukturës energjitike ato, që mund të bëhen prioritare dhe të shkojnë në rrugën e realizimit”, u shpreh ministri Gjiknuri. Ai kërkoi mbështetje për projektin e rëndësishëm të degëzimit të gazsjellësit Trans Adriatik TAP me gazsjellësin Jonian-Adriatik IAP. Sipas tij, ky investim i shërben diversifikimit të burimeve për një pjesë të vendeve të Ballkanit.

Komisioneri Hahn vlerësoi se energjia tanimë është një çështje jo vetëm e politikës së fqinjësisë së mirë por edhe asaj të zgjerimit. Sipas tij, siguria energjitike është një sfidë për të gjithë evropën ndaj përpjekjet për diversifikimin e burimeve duhet të jenë të përbashkëta.

Ai bëri thirrje për përmirësimin e lidhjeve të interkonjeksionit ndërsa nënvizoi se Samiti i Vienës do të jetë një mundësi e mirë për të prezantuar disa projekte me interes për të gjitha vendet e rajonit. Në vlerësimin e tij, projektet në energjitikë, krahasuar me ato në infrastrukturë janë më konkrete dhe e japin efektin e tyre në një kohë më të shpejtë.

Në vijim të Konferencës së Berlinit për Ballkanin Perëndimor dhe në konsultim me Komisionerin Evropian për Energjinë e Çështjet klimaterike, ministrat e gjashtë vendeve ranë dakort për miratimin e një deklarate të përbashkët, që i paraprin Samitit të Kryeministrave që do të mbahet më 27 gusht në Vienë.