Besniku i 2po2: Ja çelësi i suksesit

2po2 ishte i ftuar në 3jat në MAD TV dhe u duk  mëse komod në përgjigjet e pyetjeve të drejtuara nga Rudi dhe Mateo. Reperi i njohur na tregoi disa nga peripecitë që i janë dashur të kalojë ndërkohë që xhironte klipet por mbi të gjitha ai ka folur për bashkëpunëtorët e tij ndër vite në muzikë e klipe.Ajo që vlen për tu përmendur është fakti që 2po2 nuk tha asnjë fjalë të keqe për asnjë nga kolegët e tij. Të jetë vërtet kaq lehtësisht i përshtatshëm apo jo?!

Ai deklaroi se gjithnjë zgjedh të punojë me më të mirët dhe gjithashtu pretendon se Prishtina ka reperët më të mirë.

Vlen për t’u përmendur një moment kur 2po2 foli për diçka të cilën të gjithë do të ishim kurioz ta dinim. Ai u pyet se cili është çelësi i suksesit të tij dhe përgjigja ishte e pastër dhe e qartë e përmbledhur në dy fjalë; korrektësia dhe transparenca.

2po2 numëron një sërë bashkëpunimesh me Capital T dhe klipe të përbashkëta.  Ai thotë se Capital-i është shumë i përpiktë dhe nuk ngopet kurrë pasi kërkon gjithnjë më shumë.

S’mund të lemë pa përmendur hitin “ Prishtinali” në të cilin reperi 2po2 bashkëpunon me  DJ Blunt, Lumi B, Lyrical Son, Capital T, Real 1, Mixey & DJ Flow. Kjo këngë rezultoi një super sukses dhe vazhdon të dëgjohet masivisht. Besniku thotë se ky material nuk ishte edhe aq i vështirë për t’u krijuar pasi pati të bënte me disa nga emrat më të mirë të repit.

Por nuk ishte edhe aq i thjeshtë për t’u xhiruar klipi në momentin që djemtë patën probleme serioze me policinë e shtetit pasi kishin bllokuar rrugën. Ai thotë se nuk ishte edhe aq i bukur ky si moment por e rëndësishme është që kënga u bë hit.

Reperi vazhdoi të tregojë për bashkëpunëtorët e tij dhe duhet thënë se të gjithë e mbajmë mend bashkëpunimin e tij me Tunën dhe Dafina Zeqirin për këngën “Vibe”. Ai u shpreh se gjithnjë synon sukses dhe sapo dëgjoi demon e këngës “Vibe” ishin pikërisht këto dy artiste që i erdhën në mend. Ai thekson se ka qenë pikërisht  këngëtarja Tuna, e cila filloi rrymën R&B në Kosovë dhe Daffy atë kohë ishte një artiste e re dhe e talentuar. Nuk dimë se si mund ta merrte Dafina këtë koment pasi ajo pretendon se është “The Queen of Albanian R&B”.

Një tjetër bashkëpunim shumë i suksesshëm rezultoi edhe ai për këngën “Zemrën dot nuk ta lexoj” me këngëtaren Besa. Besniku tha se ka një respekt të veçantë për këtë artiste jo vetëm profesionalisht por edhe personalisht.

Vlen për t’u permendur fakti që Besniku ka shprehur edhe pëlqimin e tij të veçantë për Unikatilin me të cilin ka 2 bashkëpunime. Ai thotë se ky artist i përshtatet më mirë nga të gjithë dhe është gjithnjë i lumtur kur punon me të.

 Nga repertori i 2po2 duhet thënë se një sukses të madh pati kenga “Crazy Girl” në bashkëpunim me Flori Mumajesin dhe së fundmi super hiti “Beso” me Elvana Gjatën. Ai gjithashtu thotë se ka xhiruar edhe një tjetër klip me Flori Mumajesin me titull “Gjithë jetën”, por që nuk u publikua asnjëherë.  Besniku u shpreh se Flori jo vetëm ka kënduar në duet me të por ata e kanë ndihmuar njëri tjetrin në shumë projekte muzikore. Ai gjithashtu thekson se gjatë xhirimeve të klipit  “Beso” me Elvana Gjatën, ishte pikërisht Flori i cili u mor me regjinë, grimin dhe shumë detaje të tjera. Për Besnikun e 2po2, Flori është i vetmi artist tek të 30-tat që numëron mbi 500 këngë, shumica e të cilave janë super hite. Duhet thënë se Flori ka luajtur gjithnjë me idetë e tij në bashkëpunim me dëshirat e publikut të gjerë dukë krijuar ndonjëherë edhe materiale për të cilat disa njerëz kanë qenë skeptikë nëse ishin vërtet cilësore apo thjesht komerçale. Reperi u shpreh se është totalisht pro komerçalitetit dhe e mbyll duke thënë; “Ne si artistë duhet të mbijetojmë”.

Një tjetër subjekt interesant ishte edhe tema në lidhje me këngën më të fundit të Florit dhe Elvanës dhe Besniku u shpreh shkurt duke thënë se ai është totalisht kundër patriotizmit dhe se Shqipëria ka shumë probleme të tjera për të zgjidhur.

Kjo intervistë u finalizua me një pyetje tepër pikante. Çunat e pyesin reperin nëse Elvana Gjata dhe Flori Mumajesi kanë një lidhje së bashku apo jo dhe përgjigja e tij ishte surprizuese. Klikoni videon më poshtë për të dëgjuar përgjigjen e tij.