Bien interesat e depozitave, kursimet nuk sjellin fitim

Lajme E Shtunë, 17 Prill 2021 20:28

Kursimet e shqiptarëve që mbyllen në bankat e nivelit të dytë, nuk sjellin më fitim për ta, pasi interesi i depozitave me afat ka rënë. Këtë fakt e pohon edhe raporti i Bankës së Shqipërisë, për 3-mujorin e katërt të vitit 2014. Interesi i depozitave ka rënë si për ato në lekë edhe në valutë. Tashmë depozitimi i parave në bankë mund të shërbejë për ti pasur ato të sigurta dhe për të mos i mbajtur në shtëpi, ndërsa norma e fitimit ka rënë ndjeshëm. BSH raporton se normat e interesit të depozitave në lekë kanë ndjekur ecuri rënëse në tremujorin e fundit. Në terma mesatarë, interesi i depozitave në lekë shënoi 1.65% këtë tremujor, ose 0.14 pikë përqindje më pak nga tremujori i tretë. Interesi për depozitat 12-mujore në lekë shënoi 1.57% në muajin nëntor, duke u ulur me 0.16 pikë përqindje nga niveli i tremujorit të mëparshëm. Zvogëlimi i normave të interesit të depozitave në lekë është shtrirë tek të gjitha maturitetet kryesore. Normat e depozitave në euro janë shfaqur më të qëndrueshme, duke regjistruar ulje të lehta. Diferenca midis interesit të depozitave me afat në lekë dhe atyre në euro është ngushtuar, si pasojë e rënies më të madhe të parave. Mesatarisht, interesi për depozitat 12-mujore në euro rezultoi 0.62% në tetor-nëntor, nga 0.65% në tremujorin e tretë të 2014. Sipas Shoqatës Shqiptare të Bankave, totali i depozitave të vendosura pranë bankave, në fund të tremujorit të tretë 2014 arriti në rreth 12 miliardë lekë ose 1.2% më shumë sesa në fundin e tremujorit të kaluar. Depozitat e bizneseve dhe institucioneve kanë pësuar rënie, ndërsa depozitat e individëve kanë vijuar në rritje përgjatë gjithë 3-mujorit, me një rritje mesatare vjetore rreth 1.8%. Në kushtet e rënies së normave të interesit, individët po i zhvendosin kursimet e tyre drejt produkteve të depozitave me afate maturimi mbi dy vjet që ofrojnë dhe norma fitimi më të larta se sa depozitat tradicionale.