Braçe: Komisionet të nisin punën, jemi shumë vonë me raportet e institucioneve kryesore

Deputeti i PS-së, Erion Braçe ka ngritur shqetësimin për vonesat në punën e Parlamentit. Ai kërkon që Komisionet Parlamentare të nisin urgjentisht funksionimin e tyre normal. Po ashtu thekson se janë shtyrë shumë në kohë detyrimet ligjore që lidhen me raportimin dhe analizimin e punës së disa prej institucioneve më të rëndësishme të vendit.

Postimi i plotë

Parlamenti duhet të fillojë punë më në fund! Komisionet të nisin punën. Komisioni për Ekonominë, Financat e Punësimin, ka një mal me detyrime ligjore që duhet të përmbushen tani.

Është shumë vonë! Banka e Shqipërisë, Kontrolli i Lartë i Shtetit, Autoriteti i Mbikëqyrjes Financiare, Autoriteti i Konkurrencës, këto së pari, duhet të raportojnë për punën e vitit 2024, përmbushjen e detyrave të lëna.

Komisioni i Ekonomisë që është përgjegjës për to duhet të marrë sa më parë në shqyrtim e analizë punën e tyre edhe në raport me njerëzit. Imagjinoni, për pak ditë jemi në tetor, d.m.th po mbyllet dhe ky vit, ndërkohë që duhet të analizojmë punën e vitit që shkoi! Është shumë vonë.