Buxheti miliona euro për policitë private, më shumë se Policia e Shtetit

Shteti shqiptar shpenzon shuma të konsiderueshme për subjekte private për të siguruar mbrojtjen e gjithanshme të institucioneve shtetërore. Madje, shuma që shpenzohet për këtë qëllim ia kalon asaj që përdoret nga buxheti i shtetit për të financuar veprimtarinë e aparatit të Drejtorisë së Përgjithshme të Policisë së Shtetit.

Sipas Open Data, që hedh dritë mbi sasinë dhe shumat e transaksioneve të kryera nga thesari, rezulton nga data 1 janar 2015 deri në datën 1 korrik 2016 (18 muaj), nga Thesari i Shtetit për këtë kategori janë paguar 1.980.664. 232 lekë, përmes 5.352 transaksioneve ose 14.5 milionë euro.

Sipas Shqiptarja.com, në të njëjtën kohë, aparati i Drejtorisë së Policisë së Shtetit, në total për 18 muaj ka shpenzuar nga buxheti 1.395.565.032 lekë.