Del Potro i rikthehet tenisit me humbje

Në ditën e dytë të Mastersit të Miamit u zhvilluan ndeshjet e ruandit të parë kështu që nuk zbriti në fushë asnjë nga të mëdhenjtë pasi të gjithë favoritët kryesorë për suksesin final në turneun amerikan janë kualifikuar automatikisht në ruandin e dytë. Ndeshja më interesante e ditës ishte ajo mes kanadezit Vasek Pospisil dhe argjentinasit Juan Martin Del Potro i cili u rikthye në fushat e tenisit pas një mungese shumë të gjatë për arsye dëmtimi. Ish numrit 4 të Botës dhe fituesit të Us Open në vitin 2009 i duhet ende kohë për të rigjetur formën e tij më të mirë, dicka të tillë e tregoi fusha e lojës pasi Del Potro u mposht 2-0 me sete nga Pospisil.

Tenisti kanadez fitoi të parin 6-4 dhe të dytin 7-6(9-7 në tiebreak) duke mbyllur llogaritë me Del Potron në dicka më pak se 2 orë lojë. Në ruandin tjetër Pospisil do të masë forcat me bullgarin Grigor Dimitrov. U përcaktua edhe kundërshtari i kampionit në fuqi dhe numrit 1 të Botës serbit Novak Djokovic i cili do të jetë sllovaku Martin Klizan. Një sfidë spektakolare rezultoi edhe ajo mes kroatit Borna Coric dhe austrikuat Andreas Haider-Maurer. 2-1 me sete në favor të tenistit ballkanas ishte rezultati i sfidës me Coric që siguroi kështu një biletë për në ruandin e dytë. Një fitore të vuajtur arriti edhe tenisti kazak Mikhail Kukushin përballë amerikanit Steve Jonhson. Në fazën tjetër të Mastersit të Miamit u kualifikua edhe Alexandar Dolgopolov. Tenisti ukrainas mundi lehtësisht 2-0 me sete lituanezin Berankis. Nuk hasi në vështirësi të mëdha për të një siguruar një biletë në fazën tjetër as austriaku Jurgen Melzer që kaloi 2-0 me sete amerikanin Ryan Harrison dhe tashmë duhet të masë forcat me francezin Jeremy Chardy.