Deputetja e PD për kandidatët e rinj: S’gdhihen në pallate ish-ministrash, folën në çadër

Kureshtja ndaj listave të partive politike për zgjedhjet e 25 qershorit, shkon më së shumti tek kandidatët e rinj dhe e reja që partitë kërkojnë të sjellin. Të rinjtë e listave edhe pse jo figura publike, këto ditë kanë nisur të bëhen pjesë e emisioneve televizive.

I tillë ka qenë prezantimi i kandidates 20-vjeçare të PD-së për qarkun e Tiranës, Barbara Doda, e cila “befasoi” me pohimin se kryetarit të degës së PD-së për Tiranën, i thërret “xhaxhi” si dhe zonjave “teta”

Kjo deklaratë e Dodës në studion e emisionit “Opinion”, po jehon në “xhiron e rrjeteve sociale” dhe të portaleve, me tituj bombastik. Deputetja demokrate e Tropojës, Mimoza Hajdarmataj, kujton jo pa ironi thënien e famshme të Joleza Kokës, se “gdhihej te pallati i Ministrit”, edhe pse nuk e përmend atë me emër, në një status në rrjetin social facebook, dedikuar 20 vjeçares dhe të rinjëve që kandidojnë nën logën e PD-së.

“Për të gjithë ata që lajm përbënte fakti që Barbara i ishte drejtuar me “xhaxhi” kryetarit të degës dua t’u them se PD krenohet me këto modele të rinjsh dhe të rejash që edhe pse shumë herë u gdhinë mbi projekte e jo te ndonjë pallat ish-ministri, përsëri ishin me ne në çadrën e Lirisë….e në vend të joshen me ndonjë samrtfon apo kamping, i’u bashkuan kauzës sonë për zgjedhje të lira dhe të ndershme”, shkruan Hajdarmataj.

Mimoza Hajdarmataj edhe pse nuk është pjesë e listës së kandidatëve, mbetet e angazhuar dhe këtë e tregon me mbështetjen jo vetëm ndaj Barbarën por dhe ndaj shumë të rinjve ( e jo vetëm) që i janë bashkuar Partisë Demokratike. Në një koment në facebook, deputetja i kujton të rinjëve për hapin e rëndësishëm që po marrin. “Ti dhe disa kandidat të tjerë keni moshën e fëmijëve tanë sot, por edhe ne kishim moshën tuaj kur u bëmë pjesë e Lëvizjes Historike të Dhjetorit ’90. Për ne nuk ishte e lehtë atëherë por as për ju nuk është e lehtë tani”.

Deputetja i kujton kandidates së re, që po merr një detyrë e cila nuk është e lehtë por që ka zgjedhur të sfidojnë paragjykimet. Sipas deputetesm kandidatët e rinj, në vend që të shijojnë pushimet, janë bërë bashkë për politikën. “Në vend që të filloje planet për të shijuar pushimet, ke zgjedhur të sfidosh mosbesuesit e paragjykuesit, se të rinjve nuk mund t’u lihen çështje të mëdha në dorë si politika. Në fakt, 20 vjeçaret si ty po guxojnë sot të sfidojnë dëshpërimin dhe dyshimin e madh se ky vend nuk bëhet”.

Më tej, Hajdarmataj uron Dodën në këtë përballje të re por të gjithë kandidatët e rinj, në sfidën e 25 qershorit. “Prandaj të përgëzoj me shpirt që pranon të tejkalosh dhe vetveten duke i hyrë një përballjeje të re, që nuk ta mëson dot asnjë universitet, atë të përballjes me publikun, median, politikën apo edhe me bashkëmoshatarët”.

R.Sh