Dhoma Amerikane, Crawford: Më shumë siguri për investitorët

Shqipëria duhet të ofrojë më shumë siguri për investitorët, t’i japë fund burokracive dhe për më tepër ka nevojë për promovim.

Janë këto sugjerimet e Presidentit të Dhomës Amerikane të Tregtisë Mark Crawford.

I ftuar në emisionin “Përtëfol”, në TV Scan, Crawford theksoi barra fiskale është e rëndësishme për ta bërë vendin atraktiv krahasuar me rajonin, por jo problemi kryesor sa i përket investitorëve të huaj.

Këta të fundit po largohen për shkak të konflikteve të vazhdueshme tregtare,  përfshirë edhe presionet që vijnë sidomos nga problemi i ndarjes së pronave.

Crawford evidenton se sipërmarrësit amerikanë kanë tërhequr investimet në  energjetikë, ndërkohë një sektor premtues dhe me interes rezulton ai financiar.

Teksa ndalet në perceptimin që investitorët e huaj kanë për Shqipërinë, Presidenti i Dhomës Amerikane të Tregtisë, thotë se është mjaft e rëndësishme që Shqipëria të promovojë sektorët ku ka potencial për të investuar.

Dhoma Amerikane e Tregtisë i ka paraqitur ministrisë së financave, një listë propozimesh prej 25 pikash lidhur me paketën fiskale të vitit 2018, duke vënë theksin tek tatimi mbi dividendin dhe ulja e kufirit të regjistrimit të TVSH apo aftësitë menaxhuese të administratës tatimore lidhur me to.