Dumani mesazh Ben Ahmetajt nga Kuvendi: Eja bëhu bashkëpunëtor i drejtësisë

Kreu i Prokurorisë së Posaçme: “Hetimet paraprake për Tiranën nuk kanë përfunduar. Ahmetaj është në kërkim ndërkombëtar, por mund të bashkëpunojë me drejtësinë.”

Në një seancë të gjatë dhe të tensionuar dëgjimore në Kuvendin e Shqipërisë, kreu i SPAK, Altin Dumani, dha detaje të reja mbi hetimet që lidhen me aferën e shumëpërfolur të inceneratorëve, duke iu përgjigjur pyetjeve të drejtpërdrejta të deputetes së Partisë Demokratike, Jorida Tabaku.

Në qendër të interesit publik mbeten tre dosjet e mëdha — Elbasani, Fieri dhe Tirana, që prej vitesh janë simbol i korrupsionit të nivelit të lartë në vend.

Sipas Dumanit, Prokuroria e Posaçme ka hetuar deri më tani 71 persona të përfshirë në këto çështje, “të të gjitha niveleve”, siç u shpreh ai, duke përfshirë ish-ministra, drejtues institucionesh, zyrtarë vendorë e sipërmarrës të përfshirë në skemën e koncesioneve.

“SPAK ka hetuar në kuadër të këtyre procedimeve penale 71 persona të të gjitha niveleve. Disa prej tyre janë në fazë gjykimi, disa janë dënuar me vendim të formës së prerë, ndërsa për disa të tjerë hetimet vijojnë për fakte të tjera penale,” – deklaroi kreu i SPAK.

Ai sqaroi se për inceneratorin e Fierit dhe Elbasanit, proceset kanë kaluar tashmë të gjitha fazat e shqyrtimit gjyqësor dhe se “gjykatat kanë konfirmuar drejtësinë e kualifikimeve ligjore të bëra nga SPAK”.

Këto dy çështje konsiderohen të mbyllura në aspektin penal, me vendime që vërtetojnë ekzistencën e veprimeve korruptive dhe abuzimeve me fondet publike.

Tirana, ende nën hetim: “Veliaj nuk është marrë i pandehur sepse hetimet nuk kanë përfunduar”

Pyetja më e drejtpërdrejtë e seancës erdhi nga deputetja Jorida Tabaku, e cila kërkoi të dinte pse kryebashkiaku i Tiranës, Erion Veliaj, nuk është marrë ende i pandehur, pavarësisht rolit të tij në kontratat dhe procedurat e inceneratorit të kryeqytetit.

Dumani iu përgjigj prerë: “Hetimet paraprake për inceneratorin e Tiranës nuk kanë përfunduar ende. Ato vijojnë dhe përfshijnë elemente të tjera penale që po verifikohen nga grupi hetimor.”

Kjo deklaratë konfirmon se SPAK nuk e ka mbyllur ende dosjen e Tiranës, e cila konsiderohet më e komplikuara nga të treja, për shkak të përmasës financiare dhe numrit të institucioneve të përfshira.

Sipas burimeve të mëparshme, vetëm për këtë dosje janë sekuestruar dhjetëra kontrata, dokumente bankare dhe prova elektronike që lidhen me ndarjen e fondeve dhe procedurat e tenderimit.

Një tjetër pikë e nxehtë e seancës ishte rasti i ish-zëvendëskryeministrit Arben Ahmetaj, i cili ndodhet në arrati dhe është shpallur në kërkim ndërkombëtar për disa vepra penale që lidhen me aferën e inceneratorëve.

Dumani, i pyetur nëse dëshmitë publike të Ahmetajt kanë ndonjë vlerë ligjore, u përgjigj me kujdes: “Deklarimet publike të tij vlerësohen rast pas rasti. Për ne, ai sot është person në kërkim ndërkombëtar për disa vepra penale. Në çdo moment që një subjekt dëshiron të bëhet bashkëpunëtor i drejtësisë, është mëse i mirëpritur.”

Kjo fjali e fundit e Dumanit, në thelb, është një ftesë e hapur për negociim me drejtësinë, duke i dhënë Ahmetajt një shans të vonuar për të reduktuar përgjegjësinë penale nëse ndihmon zbardhjen e skemës së plotë.