Ëndrrat e të rinjve nuk do të mbesin vetëm në sirtar… 

“Ndjej keqardhje për maturantët e këtij brezi, për gjithë ata të rinj që janë strapacuar në 12 vite shkollë, që ëndrrat e tyre nuk duan të mbesin vetëm në sirtar.  Kjo situatë është shqetësuese e problematike në kushtet aktuale, kur nuk është mundësia e të bërit një konkurs të sigurt dhe të painfluencueshëm, në mënyrë që mos të bëhet një tender në vend të konkursit”…

Nga Ilda Lamçe

Të jesh një i ri 18 vjeçar, maturant, plot ëndrra e pasion për të ardhmen, të kesh investuar 12 vite nga jeta jote, përkushtim, mund e djersë, e në fund të kuptosh që në atdheun tënd, s’je gjë tjetër, veçse një kavie për eksperiment?

 Të jesh lindur dhe rritur në një mjedis social, ku ke gjetur motivim për dritën e dijes, dhe të përfundosh duke u zhgënjyer nga rregulla absurde që ndryshojnë nga viti në vit, nga sistemi ynë arsimor. Dhe këto rregulla që janë marrë për vlerësimin e konkurrentëve për në Universitete, cenojnë disa parime të shtetit të së drejtës, cenojnë lirinë e të studiuarit me dinjitet në shtetin tënd, cenojnë sa e sa ëndrra të të rinjve shqiptarë…

Arsimimi i të rinjve shqiptarë sot, duhet parë nga kushdo si një obligim social më madhor, se axhenda politike, dhe prandaj për të duhet të jemi më parë qytetarë. Kanë fituar të drejtën e studimit në 10 universitete, shumica e atyre maturantëve me mesatare 9,5 e lartë që nga vijnë nga gjimnazet private nga e gjithë Shqipëria dhe nga gjimnazet në rrethe.

Shumë nxënës me mesatare 9,2 e 9,1 të marrë nga gjimnazet më të mirë shtetërorë të Tiranës kanë mbetur jashtë listave të fituesve. Akoma dhe më absurditet është fakti që për pesë ditë fillon viti i ri akademik në arsimin parauniversitar, dhe që prej ditës së sotme një pjesë e konsiderueshme e zyshave të gjimnazeve të rretheve( nuk e di në do ta meritonin ndonjëherë ti quaja të tilla, pasi as diplomën e universitetit nuk e kanë në profilin e tyre) kanë filluar të bëjnë fshehtas minibiznese me notat, për të rritur mesataret, e ta korruptojnë akoma e më shumë këtë sistem arsimor të çalë.

 Ndjej keqardhje për maturantët e këtij brezi, për gjithë ata të rinj që janë strapacuar në 12 vite shkollë, që ëndrrat e tyre nuk duan të mbesin vetëm në sirtar.  Kjo situatë është shqetësuese e problematike në kushtet aktuale, kur nuk është mundësia e të bërit një konkurs të sigurt dhe të painfluencueshëm, në mënyrë që mos të bëhet një tender në vend të konkursit.

A ka mundësi të rregullohet një gjë e tillë? Unë them që po, disa gjëra, por do ndjeshmëri dhe dashamirësi. Duhen marrë masa që vitin e ardhshëm të krijohet një infrastrukturë e sigurt, dhe të ndryshohet procedura e rekrutimit të studentëve të UT. Të rikthehet konkursi ose sistemi i vjeter i maturës, mjafton mos të bëhen më biznese me mesataret e notave dhe shpërfillje me mundin e përgatitjen e nxënësve.