FIFA, Blatter sulmon SHBA-në dhe Europën…pritet “kundërsulmi”

Një ditë pas zgjedhjes së tij për herë të pestë në krye të FIFA-s, presidenti Sepp Blatter sulmon vendet më të fuqishme të Europës  dhe SHBA-në. – “Nga UEFA dhe presidenti i saj ka qenë një fushatë urrejtje. Unë i fal të gjithë, por nuk harroj”, ka deklaruar Blatter.  Jo vetëm Europa, por edhe SHBA, protagoniste e hetimeve që çoi në arrestimin e disa prej anëtarëve të vetë federatës, ka qenë në sulmet e Blatter.  – “Shtetet e Bashkuara dhe Britania ishin kandidate për të pritur Kupat e Botës në vitet e ardhshme dhe humbën. Asgjë nuk do më heqë nga mendja se sulmet e tyre janë të rastësishme. Nëse SHBA ka punë me krimin që i takon qytetarëve amerikanë, le ti arrestojë atje, dhe jo këtu në Zyrih, ku po bëhet dhe një Kongres”, tha Blatter.  Por raporti me qeverinë europiane të futbollit mbetet i detyrueshëm. – “Duhet të vazhdojmë te kemi raporte me Michel Platini. FIFA nuk mund të mbijetojë pa UEFA-n dhe e kundërta”, vijon 79-vjeçari Blatter. Megjithatë, pavarësisht zgjedhjes dhe mandatit që mori, për shkak se terreni ishte përgatitur me kohë, vështirë se Blatter do të mund të drejtojë me sukses në katër vitet e ardhshme organizimin më të lartë të futbollit botëror. Vende si Britania e Madhe dhe SHBA-ja janë hedhur në sulm, kundrejt krerëve të FIFA-s, teksa tashmë do të kenë terrenin më të favorshëm për “kundërsulm”.