FMN: Shqipëria me kreditimin më të ulët në rajon

Rimëkëmbja e ekonomisë shqiptare është e lidhur direkt me rritjen e kreditimit dhe për këtë duhet të merren masa të menjëhershme.

Ky ka qenë mesazhi i dhënë nga shefja e FMN-së për Shqipërinë Anita Tuladhar në konferencën e 4 me përfaqësues të bankave te nivelit te dyte dhe institucioneve te tjera te rëndësishme financiare ne vend. Sipas përfaqësues së FMN-së duhet të bëhet kujdes edhe me çështjen e pronave.

Tuladhar: Kreditimi në Shqipëri është më i ulëti në rajon në krahasim me Prodhimin e Brendshëm Bruto. Edhe në muajt e parë të këtij viti kreditimi ka qenë i dobët dhe i ngadaltë pasi kjo ka qenë e lidhur me fshirjen e bilanceve. Në këtë situatë ka ndikuar si oferta dhe kërkesa .Për të përmirësuar situatën duhet të trajtohen disa probleme si ekzekutimi i kolateralit apo paaftësia paguese. Duhet ndërhyrje  për të  zgjidhur çështjen e pronave dhe reformat e gjyqësorit.

 Edhe Guvernatori i Bankës së Shqipërisë Gent Sejko e pranoi problemin e kreditimit në ekonomi, ndërsa i bëri apel bankave që të mos tregohen shumë të shtrënguara.

Sejko: Dua t’i bëj thirrje menaxherëve të bankave që të promovojnë Shqipërinë  pasi e di që ka perceptim negativ për vendin në bankat mëma por ju duhet të paraqisni realitetin siç është. Nxitja e kreditimit është një element kyç dhe ne nxisim  bankat tregtare që të jenë më largpamëse dhe elastike në politikat e kreditimit.

 Ministri i financave Arben Ahmetaj bëri një prezantim të masave të  marra për të përmirësuar situatën ekonomike.

Ahmetaj: Ministri dhe Ministria e Financave është koordinatore e strategjisë së qeverisë për uljen e nivelit të kredive të këqija në ekonomi. NPL është përmirësuar nga 22,9% në 19,2% me synimin për të arritur 15% në fund të 2017. Ne kemi thënë që nuk do të ketë më rritje taksash.

Ministrja e Zhvillimit Ekonomik  Milva Ekonomi theksoi se po bëhet gjithçka për të stabilizuar situatën ekonomike në vend.