Fondet për Bashkitë – Në 2018-ën, 5% më shumë nga transferta e pakushtëzuar

Transferta e pakushtëzuar për vitin 2018  për pushtetin vendor do të jetë 5 % më e madhe se  fondet  e  përfituara  gjatë këtij viti.

Sipas një udhëzimi plotësues të  Ministrisë së Financave, për  hartimin e buxhetit, fokusuar te  financat e qeverisjes vendore, sqarohet se  duke filluar nga janari i vitit të ardhshëm  njësitë e qeverisjes vendore  përfitojnë 25 % të të ardhurave nga taksa vjetore për qarkullimin  e mjeteve të përdorura, si dhe 2 % të të ardhurave nga tatimi mbi të ardhurat personale.

Ndërsa transferta  specifike për vitin2018 do të jetë në të njëjtin nivel financimi si  në 2017. Të gjitha këto specifika  për përfitimin e fondeve gjatë vitit të ardhshëm buxhetor, janë përcaktuar qartë në udhëzimin plotësues të Ministrisë së Financave  për hartimin e  programit afatmesëm buxhetor për njësitë e qeverisjes vendore.

Ky udhëzim përmban tavanet përfundimtare të shpenzimeve dhe afatet për përgatitjen e këtij drafti.

Bazuar në këtë udhëzim, brenda datës 15 shtator, njësia  e qeverisjes vendore  dërgon në Ministrinë e Financave dokumentin  e programit buxhetor afatmesëm, ndërsa  ky dikaster  zhvillon seance konsultimi me këto njësi brenda datës 5 tetor.