Gjergj Luca: Lamtumirë Fatos Nano, lideri që liberalizoi dhe transformoi PS-në në një parti evropiane

“Lamtumirë Fatos Nano, ike duke lënë pas emrin e mirë si liberal, si qytetar, si danoç politik që e ç’komunistizove veten dhe partinë. Do na mungojë toleranca jote, do na mungojë zgjuarsia jote, do na mungojë jeta jote prej rebeli…”

Me këto fjalë të drejtpërdrejta e të ngrohta, sipërmarrësi Gjergj Luca ka përcjellë homazhin e tij për Fatos Nanon, i cili u nda nga jeta sot, më 31 tetor 2025, në moshën 73-vjeçare, pas një beteje të gjatë me një sëmundje të rëndë, të cilën nuk arriti ta mposhtte.
Nuk mund të mungonte zëri i Gjergj Lucës në këtë lamtumirë. Ai që e njohu nga afër, ai që shpesh ka zgjedhur të thotë të vërtetat pa ngurrim, e kujton sot Fatos Nanon si një figurë atipike të politikës shqiptare: një lider që la gjurmë të pashlyeshme në transformimin e së majtës dhe në udhëheqjen e Partisë së Punës drejt modelit modern, evropian të Partisë Socialiste.
Në videomesazhin e publikuar në rrjetet sociale, Luca vlerëson rolin e pamohueshëm që Nano pati në modernizimin e të majtës shqiptare, në futjen e një fryme liberale e qytetare, që në fakt ishte shenja e tij dalluese si njeri dhe si politikan.
Duke u ndalur te ky dimension, Luca shprehet:
“Se ai Ramiz Alia paska qenë burri më i mençur i diktaturës komuniste, sepse zgjodhi një liberal si ty, një burrë demokrat si ty; zgjodhi një njeri që donte të bukurën, që donte muzikën, që donte vesin… Ti transformove të majtën, themelove Partinë Socialiste moderne, duke e bërë një parti të dashur për njerëzit, duke e bërë një forcë që mishëron vlerat evropiane, me të cilat sot dëshmon vizion e besueshmëri në rrugën drejt integrimit të Shqipërisë në Evropë.”
Në këtë lamtumirë, Luca nuk flet vetëm për mikun e tij, por për një figurë që, pavarësisht polemikave që e kanë shoqëruar gjatë dekadave, mbetet pjesë e padiskutueshme e historisë politike të Shqipërisë së tranzicionit.
Ai përcjell ngushëllimet më të sinqerta për familjarët, duke kujtuar se Fatos Nano do të mbetet, për ta dhe për shumë shqiptarë, një burrë i madh i historisë së vendit.
I paharruar qoftë kujtimi yt, Fatos Nano.

Albert Vataj