Gjykata “rrëzon” prokurorinë, Shpëtim Gjika “fiton” lirinë

Gjykata shpërfilli kërkesat e dhe pretendimet e Prokurorisë dhe i dha të drejtë kreut të Bashkisë së Vlorës, Shpëtim Gjika, sepse,  jo vetëm që nuk e riktheu atë në qeli, por nxori nga burgu edhe shefen e Urbanistikës, Dorjana Sulaj, si dhe biznesmenin Artur Haxhi, që akuzoheshin bashkë me kryebashkiakun vlonjate prej tre mandatesh, për shpërdorim detyre në lidhje me lejen e një pallati që ishte dhënë në vitin 2011. Kësisoj është rrëzuar kërkesën e prokurorisë së Vlorës, e cila kishte apeluar çështjen ditë më parë dhe kishte kërkuar ndryshimin e masës së sigurisë nga detyrim paraqitje, në arrest me burg, për kryebashkiakun e Vlorës. Ditën e djeshme, Gjykata e  Apelit dëgjoi pretendimet e palëve dhe la në fuqi vendimin e Gjykatës së Shkallës së Parë, që i kishte ndryshuar masën e sigurisë Shpëtim Gjikës, nga arresti me burg në detyrim paraqitje. Ndryshimi i masës nga gjykata erdhi dy ditë pas arrestimit të Gjikës, i cili u shtrua në spital ditën e arrestimit. Ai u transferua nga Vlora në ambientet e spitalit Amerikan, ku ai iu nënshtrua një koronografie, pasi ishte ndjerë keq gjatë ditës së parë të ndalimit. Në këto kushte, gjykata pasi pa gjendjen e tij shëndetësore ndryshoi masën e arrestit ndaj tij.  Pas daljes nga spitali, Gjika u paraqit në prokurorin së Vlorës dhe u njoh me akuzat. Gjatë seancës së djeshme në Apel, Prokuroi i çështjes akuzoi Gjikën se ishte përpjekur të pengonte hetimet dhe se Gjykata nuk mund të përcaktonte nga ana teknike se në cilat kushte duhet të kurohej kryebashkiaku i Vlorës. Gjika i quajti të pavërteta akuzat për falsifikim të dokumentacionit, duke lajmëruar se për këtë çështje do ngrejë padi ndaj organit të akuzës. Të martën kryebashkiaku i Vlorës u paraqit në Prokurorinë e këtij qyteti, ku për më shumë se 30 minuta dha përgjigje në lidhje me rolin e tij rreth akuzës së ngritur nga prokuroria. Akuza e ngritur ndaj tij ka lidhje me ndërtimin e një pallati në qendër të Vlorës, ku sipas prokurorisë Gjika e ka dhënë lejen e ndërtimit  bazuar në dokumentacion të falsifikuar. Ndërkaq edhe për dy të akuzuarit e tjerë, drejtoren e Urbanistikës në bashkinë e Vlorës, Dorjana Sulajn dhe biznesmenin Artur Haxhi, Gjykata e Apelit ndryshoi masën e sigurisë nga arresti me burg, në detyrim paraqitje.