Guvernatori: Sistemi bankar në vend, i shëndetshëm

Banka e Shqipërisë, në bashkëpunim me Qendrën e Studimeve të Evropës Juglindore të Universitetit të Oksfordit, organizoi të enjten në Tiranë konferencën e nivelit të lartë me temë “Zgjerimi i politikave monetare dhe stabilitetit financiar”.

Në këtë konferencë ishin të pranishëm kryeministri Edi Rama, Guvernatori i Bankës Qendrore, Gent Sejko, përfaqësues të trupit diplomatik të akredituar në Tiranë, përfaqësues të lartë të bankave qendrore, përfaqësues të institucioneve financiare ndërkombëtare si Fondi Monetar Ndërkombëtar e Banka Botërore, rrethet akademike në vend, përfaqësues të sistemit bankar e financiar etj.

Guvernatori i Bankës së Shqipërisë në fjalën e mbajtur me këtë rast tha se, sistemi bankar në vend është i shëndetësh dhe i mirëkapitalizuar.

Banka e Shqipërisë, deklaroi Guverantori, mbetet e angazhuar për një politikë monetare lehtësuse, për nxitjen e kreditimit ekonomik të vendit. Ndërsa sistemi bankar në vend paraqitet likuid për mbështetjen dhe financimin e biznesit.

Pasojat e Brexit, vijoi Sejko, potencialisht ekzistojnë për Shqipërinë dhe rajonin tonë, por mbeten ende të vëshitra për t’u identifikuar.

Guvernatori tha se, “Brexit përbën një fenomen përcaktues për BE dhe Eurozonë. Si i tillë, nuk mund të kalojë pa lënë gjurmë në Shqipëri dhe në rajonin tonë. Ai mund të shoqërohet me efekte negative direkte apo indirekte, afat shkurtër apo afatgjata në tregjet e punës, të mallrave dhe shërbimeve.”

Në Shqipëri, tha Sejko, efektet e drejtpërdrejta vlerësohen të jenë të vogla, por bashkëpunimi tregtar me Mbretërinë e Bashkuar mbetet i ulët. Eksporti i mallrave shqiptare në Mbretërinë e Bashkuar përbën vetëm 0.2% të totalit të 10 viteve të fundit. Ndërsa importi është rreth nivelit 1.1%. Raporte të ulëta paraqet edhe stoku i investimeve të huaja britanike në Shqipëri, ndërkohë ndikimet ne remitancat janë më të larta, por jo përcaktuese.

“Efektet e tërthorta do të varen nga dikimi që do të ketë Brexit në ekonomi dhe sistemin ekonomik. Pasojat e Brexit për Rajonin dhe Shqipërinë ekzistojnë potencialisht, por mbeten ende të vështira për tu identifikuar”, deklaroi Guvernatori Sejko.