Hiqen edhe 30 leje minerare

Lajme E Martë, 18 Nëntor 2014 09:37

Dhe kjo, në kuadër të monitorimit për zbatimin e detyrimeve ligjore nga ana e subjekteve të licencuara në fushën e industrisë minerare. Kështu, kontrollet e ushtruara nga ekspertët e kësaj ministrie është konstatuar se këto subjekte kanë mospërmbushje të detyrimeve ligjore, kryesisht për mospagesë të garancive financiare të mjedisit. Por nga ana tjetër, ky dikaster konfirmon se paralelisht me kontrollin ndaj zbatimit të detyrimeve ligjore, ai në fakt vazhdon mbështetjen dhe nxitjen e investimeve dhe bizneseve prodhuese në fushën e energjisë dhe të industrisë. Duke risjellë në kujtesë se deri në muajin shtator 2014 janë miratuar pikërisht prej ministrisë së Energjisë dhe Industrisë, dhe përcjellë për dhënie leje zhvillimore komplekse një sërë objektesh të natyrës energjetike e industriale. Konkretisht, gjatë këtyre muajve është miratuar leja zhvillimore komplekse për ndërtimin e linjës së transmetimit të energjisë elektrike 110 kV, Erskë-Përmet, pjesë e ndërtimit të Unazës së Jugut dhe leja për ndërtimin e pjesës së mbetur të projektit Unaza e Jugut 110 kV. Por MEI ka miratuar gjithashtu lejen zhvillimore komplekse për ndërtimin e centralit elektrik fotovoltaik nga shoqëria ujësjellës kanalizime Korçë Sh.a, me fuqi të instaluar 1Mv. “Janë shqyrtuar një sërë projektesh të tjera të cilat janë miratuar tashmë në Komisionin e shqyrtimit të kërkesave për leje të natyrës ndërtimore, dhe janë në fazë të përcjelljes për shqyrtim në AKPT. Këtu përfshihet ndërtimi i parkut Eolik në Synej-Kavajë, ndërtimi i Uzinës së Pasurimit të Ferrokromit në Elbasan, ndërtimi i pasurimit të ferrokromit në Ternovë-Bulqizë dhe ndërtimi i impiantit të pasurimit të Rërave Bituminoze në Patos-Marinës”, bëjnë gjithashtu me dije këto burime.