Kreu i ILD: Sistemi gjyqësor është nën trysni antikushtetuese për të ushtruar detyrën

Kreu i Inspektoratit të Lartë të Drejtësisë, Artur Metani, gjatë fjalës së tij në një takim me institucione të drejtësisë organizuar nga projekti Matra i qeverise holandeze, u shpreh se prej kohësh sistemi gjyqësor është nën trysni.
Sipas Metanit, kjo është një trysni antikushtetuese për të ushtruar detyrën ose jo, në një formë të caktuar, teksa shton se kjo gjë vë magjistratët në provë të vështirë.
“U bë kohë që sistemi gjyqësor është nën një trysni, për mua antikushtetuese, për të ushtruar detyrën ose jo, në një formë të caktuar. Nga të gjithë. U bë kohë që fyerjet për magjistratët janë pjesë më e konsiderueshme e artikulimit kur vjen puna te kritikat për pushtetin gjyqësor. Natyrisht, të papranueshme këto në çdo pikëpamje. Kjo i vë magjistratët në provë të vështirë.
Por, testi i pavarësisë, i ndarjes së pushteteve dhe i shtetit të së drejtës, nuk është vetëm retorikë. Ndryshe nga pushtetet apo institucionet e tjera, magjistratët dhe institucionet e pavarura të drejtësisë e kanë një lloj kufizimi, që vjen me detyrën për t’u treguar të përmbajtur, edhe kur sulmohen pa të drejtë. Mes zërave të fortë publikë, kjo i bën që të perceptohen si të dobët, por nuk është aspak ky rasti. Vetëpërmbajtja nuk duhet ngatërruar me dobësinë.
Pavarësisht deklaratave të aktorëve të ndryshëm publikë, magjistratët nuk duhet të harrojnë se reagimet publike nuk janë pjesë e funksionit të tyre. Por, vetëpërmbajtja po! Vetëpërmbajtja nuk është dobësi e asnjë lloj natyre, por respekt për lirinë e shprehjes në demokraci, është largësi kushtetuese nga natyra politike e pushteteve të tjera.
Deontologjia politike nuk duhet të diktojë sjelljen e magjistratëve. Në këtë rast, besoj se thelbi i shtetit ligjor dhe i vlerave evropiane është pikërisht mënyra se si sillemi, edhe kur nuk biem dakord me vendimet e njëri-tjetrit”, u shpreh Metani.