Kupa e Amerikës, Lionel Messi refuzon çmimin e lojtarit më të mirë

Lionel Messi refuzon të marrë çmimin e lojtarit më të mirë të Kupës së Amerikës. Pas finales së humbur ndaj Kilit, në goditjet e 11-metërshave, sulmuesi i Argjentinës nuk ka pranuar ta marrë këtë çmim individual, duke i detyruar organizatorët që ta zhduknin këtë nga skena e ngritur për fituesit. Gjithçka është zbuluar nga mediat argjentinase, që shkruajnë se pak minuta pas përfundimit të finales, ndërsa Messi po ecte i zhgënjyer në fushën e blertë, iu komunikua se ishte shpallur lojtari më i mirë i turneut. Por reagimi i tij i ka lënë të çuditur  organizatorët, që nuk kishin planifikuar një plan B. Kësisoj, 4 herë fituesi i Topit të Artë ua kishte bërë të qartë se nuk do të ngjitej në skenë për ta tërhequr këtë çmim dhe në këto kushte Kupa e Amerikës në edicionin e fundit nuk dha një çmim të rëndësishëm, sepse Lionel Messi mendon se nuk e meriton përderisa nuk arriti ta shpallte Argjentinën kampione të turneut.

Messi ka përjetuar një situatë të ngjashme edhe në fundit të Botërorit Brazil 2014, teksa pa shumë dëshirë u detyrua të tërhiqte çmimin e lojtarit më të mirë të Botërorit pas disfatës në finale me Gjermaninë.