Lista e sigurt e PS/ Kush janë prurjet e reja të Ramës: Biznesmenë dhe pushtetarë

Lista e Partisë Socialiste për zgjedhjet e 25 Majit e përcaktuar ekskluzivisht nga kryetari Edi Rama, ndryshe nga ajo e Partisë Demokratike nuk ngjalli aq shumë debate sa ajo e Partisë Demokratike.

Kjo për faktin se në momentin që ajo u shpall opozita ende ishte e vendosur që të mos merrte pjesë në zgjedhje dhe ajo listë nga pikpamja e rregullave të lojës demokratike ishte gati formale. Përveç largimit të disa figurave tradicionale të Partisë Socialiste si Arta Dade, Namik Dokle etj, ajo që ra në sy në këtë listë ishte përfshirja masive e biznesmenëve klientë të pushtetit dhe gati të gjithë figurave kryesore në pushtetin qendror dhe atë lokal.

Edi Rama ndryshe nga strategjia që përdori për zgjedhjet e katër viteve më parë këtë herë në vend të personave me rekorde kriminale ka preferuar lidhje të tyre dhe biznesmenë, të lidhur nëpërmjet punëve publike me qeverinë apo bashkitë.

Nëse bazohemi në projeksionin e rezultateve të vitit 2013, pritet që të paktën 25 deputetë të kandiduar prej Ramës, pritet të ulen për herë të parë në kuvend. Mbi 90% e tyre janë zyrtarë të lartë në pika kyçe të qeverisjes 4 vjeçare, ose biznesmenë të lidhur ngushtë me qeverinë.

Në Qarkun e Tiranës ku garohet për 34 mandate, PS në vitin 2013 fitoi 17 mandate. Bazuar në këto rezultate, në parlamentin e ardhshëm do të ulen të paktën 4 deputetë të rinj: Elona Gjebrea, ish zv/Ministre e Punëve të Brendshme; Ogerta Manastirliu, ish-ministre e Shëndetësisë; Klotilda Ferhati, anëtare e Këshillit Bashkiak Tiranë dhe Sadi Vorpsi, ish-Prefekti i Tiranës.

Në qarkun e Durrësit ku garohet për 14 mandate, Partia Socialiste në vitin 2013 fitoi 6 mandate. Nëse arrihet i njëjti rezultat, do të kemi të paktën katër deputetë që ulen në kuvend për herë të parë: Milva Ekonomi, Ministre e Ekonomisë; Ilir Ndraxhiu, biznesmen, Roland Xhelilaj, ish-prefekt i qarkut Durrës.

Në qarkun e Gjirokastrës ku garohet për 5 mandate, Partia Socialiste, në vitin 2013, arriti të fitonte 3 prej tyre. Bazuar në këtë rezultat, në kuvend do të kemi tre deputetë të rinj: Bledar Çuçi, ish ministër i Çështjeve Vendore; Mirela Kumbaro, ministre e Kulturës dhe Flamur Golemi, mjek dhe kryetar i PS-së në Gjirokastër.

Në qarkun e Korçës, ku partitë garojnë për 11 kandidatë, Partia Socialiste në zgjedhjet e fundit ka fituar 6 mandate. Nëse arrin të ruajë të njëjtin rezultat, në kuvendin e ardhshëm do të kemi 3 deputetë të rinj: Niko Peleshi, ish-zëvendëskryeministër; Elisa Spiropali, ish-Drejtoreshë e Përgjithshme e Doganave.

Në qarkun e Fierit ku garohet për 16 mandate, Partia Socialiste, në vitin 2013, fitoi 9 prej tyre. Bazuar në këto rezultate, në kuvendin e ardhshëm pritet të ulet për herë të parë Tatjana Piro, sipërmarrëse dhe këshilltare në Këshillin Bashkiak Lushnje.

Në qarkun e Vlorës ku garohet për 12 mandate, Partia Socialiste fitoi 6 mandate në vitin 2013. Nëse arrihet i njëjti rezultat, të paktën 3 deputetë do të jenë për herë të parë pjesë e kuvendit: Alket Hyseni ish-drejtor i Drejtorisë së Pastrimit të Parave dhe Vullnet Sinaj, biznesmen.

Në qarkun e Beratit garohet për 7 deputetë dhe PS fitoi 4 në zgjedhjet e 2013-ës. Bazuar në këto rezultate, të paktën dy do të jenë deputetë të rinj: Adnor Shameti, jurist-biznesmen dhe Fadil Nasufi, ish-kryebashkiak dhe prefekt i qarkut të Beratit.

Në qarkun e Shkodrës, nga 11 mandate, Partia Socialiste në vitin 2013 fitoi 4 mandate. Bazuar në këtë rezultat, në parlamentin e ardhshëm do të kemi të paktën dy deputëtë të rinj: Senida Mesi, administratore në Universitetin “Luigj Gurakuqi” dhe Luan Harusha, ish-kryetar i njërës prej komunave në Shkodër.

Në qarkun e Lezhës ku garohet për 7 mandate, PS arriti të fitojë vetëm dy të tilla në vitin 2013. Bazuar në këtë rezultat, dy mandatet e Lezhës i shkojnë Lindita Nikollës, ish-ministre dhe Pjerin Ndreut, deputet-biznesmen. Nëse PS arrin të marrë mandatin e tretë, fitues do të jetë Gjetan Gjetani, drejtues në Zyrën Vendore të Regjistrimit të Pasurive të Paluajtëshme.

Në qarkun e Kukësit ku garohet për 3 mandate, PS në vitin 2013 arriti të merrte vetëm një. Bazuar në këtë rezultat, mandati në zgjedhjet e 25 qershorit i shkon Mimi Koledhit, ministre e Mbrojtjes. Nëse PS arrin të fitojë një mandat të dytë, fitues është Safet Gjici, biznesmen, që do të ulet për herë të parë në kuvend. /syri.net