Mediu: Vota për PD-në, e vetmja mundësi për të mos e lënë Shqipërinë peng te bandat dhe klanet e Qeverisë Rama

Kryetari i Partisë Republikane, Fatmir Mediu mori pjesë në një takim me simpatizantë dhe përkrahës në lagjen numër 2 të Kavajës, në mbështetje edhe të kandidatit të PD-së për kryetar bashkie, Isa Sakja. Gjatë këtij takimi Mediu shpalosi prioritet që “Republika e Re” do të ketë në qeverisjen e Kavajës dhe të gjithë shqiptarëve.
“Ato fillojnë që nga prezantimi i Isa Sakjes, njeriut të thjeshtë dhe punëtor, familjar dhe të përkushtuar për qytetin. Me anë të taksave të ulëta, ne do të ndihmojmë individin, biznesin dhe do të krijojmë kështu një ekonomi të fortë të qëndrueshme, për Kavajën dhe të gjithë Shqipërinë”, u shpreh Mediu.
Në fjalën e tij, kryerepublikani riktheu vëmendjen mbi akuzat që opozita ka ngritur ndaj qeverisë Rama, ku gjatë 4 viteve, kryesocialisti Rama e ka përdorur pushtetin për të fuqizuar bandat dhe tarafet e tij, të lidhur me krimin dhe ka ngritur kërbaçin ligjor mbi të pamundurit dhe njerëzit në nevojë.
Mediu u bëri thirrje të pranishmëve të vlerësojnë maksimalisht mundësinë që kanë për të votuar. “Rezistenca jonë e përbashkët në “Çadrën e Lirisë” ishte tërësisht një angazhim që ju të keni zgjedhje të lira dhe të ndershme. Secili nga ju duhet të kuptojë se nuk ka asgjë më të rëndësishme se vota, të cilën e jepni një herë në 4 vjet, duke vendosur për vete, për familjen tuaj dhe për mbarë vendin. Prandaj ju bëj thirrje që të votoni nr. 6, Partinë Demokratike dhe kryeministrin e ardhshëm Lulzim Basha, si e vetmja mundësi për të mos e lënë Shqipërinë peng te bandat dhe klanet e Qeverisë Rama, që po i marrin frymën këtij vendi” u shpreh në fjalën e tij Mediu.
Ndërsa kandidati për kryebashkiak të Kavajës, Isa Sakja premtoi para simpatizantëve të pranishëm në këtë takim, se programi i PD-së për Kavajën është tërësisht i realizueshëm dhe në një kohë shumë të shkurtër do t’i japë rrugë zhvillimit ekonomik të qytetit, nëpërmjet taksave të ulëta dhe të ndershme.