Meka pranon një dyqan “hallall” të produkteve seksuale

I konsideruar si një vend i fortë për rregullat e besimit, duket se kohëve të fundit Meka po zbutet dhe plotëson dëshirat e konsumatorëve, dëshira që janë konsideruar tabu. Fjalë është për një dyqan seks, i cili pritet të hapet në qytetin e shenjtë për besimtarët myslimanë.

Dyqani me produkte në përputhje me ligjet e sharias hapet së shpejti në Mekë. “El Asira”, një kompani që merret me prodhimin e mallrave të karakterit erotik synon tregun e qytetit që vizitohet nga miliona myslimanë gjatë pelegrinazhit të haxhit.

Abdelaziz Aouragh, themeluesi i kësaj kompanie,  bëri të ditur ambicien e tij që vitin e shkuar. Ndërkohë, klerikët myslimanë dhe sheikët sauditë e kanë analizuar këtë projekt, në mënyrë që ai të jetë në përputhje me ligjet dhe zakonet e botës myslimane.

“Produktet që ne do të ofrojmë për klientët nuk kanë të bëjnë aspak me kukulla të fryra dhe vibratorë”, ka thënë Aouragh për agjencinë AFP.