Ministri jep lajmin e mirë: Rruga e Arbrit nis ndërtimin brenda 100 ditëve të para

Ministri i Infrastrukturës dhe Energjisë, Damian Gjiknuri gjatë fjalës së tij në Kuvend, prezantoi programin e institucionit që drejton dhe projektet reale që do të realizohen gjatë këtij mandati.

Ai tha se, që në 100 ditët e para do të vihet në zbatim projekti për ndërtimin e Rrugës së Arbrit.

“Në 100 ditët e para do kemi lidhur kontratën për të nisur ndërtimin e Rrugës së Arbrit. Skema e finkancimit që kemi zgjedhur është një pjesë nga buxheti dhe një pjesë do sigurohet me PPP”,- tha ai.

Ndër projektet e tjera të qeverisë, Gjiknuri renditi zbatimin e marrëveshjes ndërkombëtare me Malin e Zi, zbatimin e projektit adriatiko-jonian, autostradën adriatoko-joniane, etj.

Si i përket akseve rrugore, ai tha se do të ketë ndërhyrje në disa akse ekzistuese. “Do të zgjerohet aksi Fushë Krujë-Shkodër, by pass-i i Tepelenës, Lezhës, etj. Do të ketë përfunduar by pass-i i Vlorës dhe Fierit brenda këtij mandate”,- tha ai.

Teksa prezantoi projektet për katër vitet e ardhshme në Kuvend, Ministri i Energjisë dhe Infrastrukturës, Damian Gjiknuri, kërkoi bashkëpunimin e opozitës.

Gjiknuri: Infrastruktura do të jetë jo vetëm në qendër të zhvillimit por jam i bindur që duhet të jetë boshti ku ne të gjitha palët duhet të gjejmë konsensus për të çuar përpara projekte që do të shërbejnë shumë brezave jo kësaj qeverie.Ta konsiderojmë infrastrukturën një bosht të ri të bashkimit të politikës sonë, të gjitha palët të japin mbështetjen, bekimin e tyre. Zhvillimi i infrastrukturës dhe ekonomisë është shansi më i mirë që të rinjtë tanë të mbeten këtu në vend. Edhe opozita ka shumë për të dhënë në këtë drejtim.

Infrastruktura rrugore- Do fillohet nga siguria, infrastruktura rrugore është kthyer në burim rreziku. Që ditët e para do të marrim masa për një aksion të gjerë në gjithë territorin e vendin me synim disiplinimin e hyrjeve dhe daljeve në akset kombëtare, hapësirat rrugore do të lirohen menjëherë nga çdo objekt i paligjshëm. Na duhet bashkëpunimi dhe mirëkuptimi i qytetarëve që aksioni të përfundojë si duhet.

Që në tre muajt e parë do të ndërhyjmë në mënyrë emergjente në pikat e zeza që janë të njohura për aksidente. Do fillojë kryerja e procesit të ndriçimit, vendosja e sistemit të emergjencës SOS dhe vendosja e sinjalistikës së plotë për çdo aks kombëtar brenda vitit të parë.Autoriteti Rrugor Shqiptar do të ristrukturohet.Do gjejmë mekanizmin e duhur për ti dhënë zgjidhjen e duhur problemit të transportit ndërqytetas dhe rrethqytetas. E ashtëquajtura “policia gri” do të hiqet që në ditët e para nga rruga dhe do të riorganizohen plotësisht Drejtoritë Rajonale.

Primare është integrimi i sistemit rrugor shqiptar në rrjetet ballkanike. Objektivi afatshkurtër do të jetë sigurimi i zbatimit të marrëveshjes ndërkufitare me Malin e Zi si pjesë e projektit të autostradës Adriatiko-Joniane, ndërsa ai afatmesëm lidhet me rritjen e efikasitetit të marrëveshjeve të tjera të kufirit.Ndër projektet më prioritare të qeverisë do të jenë autostrada adriatiko-joniane për të cilën do të fillojë menjëherë puna për studimin e fizibilitetit në mënyrë që të bëhet shumë shpejt e financueshme.Do investohet në zgjerimin e aksit Fushë Krujë-Shkodër, aksin Thumanë-Kashar-Rrogozhinë, by-passin e Tepelenës, Lezhës dhe Tiranës, do investohet në dublimin e aksit Milot-Rrëshen, do përfundojë by-passi i Fierit dhe Vlorës.Do vazhdojë faza intensive për ndërtimin e rrugës së lumit të Vlorës si dhe do të ndërtohet aksi Kardhiq-Delvinë dhe unaza e plotë e Tiranës.

Brenda 100 ditëshit të parë do kemi ofertën finale dhe kontratën e lidhur për fillimin e ndërtimit të Rrugës së Arbrit.Skema që kemi zgjedhur, një skemë e qëndrueshme financimi, do të jetë pjesërisht e shtetit dhe pjesa tjetër me investimet private. Ku në fund fare do të paguhet nga qytetarët shqiptarë. Nuk ka asnjë skemë tjetër. Ku keni parë PPP ku përfituesi final të mos paguajë veprën publike.Ka disa projekte të ardhura në Ministri, ka projekte të tjera që presin. Qeveria do të ndjekë shumë stimuj financiarë për automjete më të pastra, nxitja e transportit ekologjik ndaj mjedisit, sistemi inteligjent për transportin, rrethrrotullime, krijimi i by-passeve në rrugët kombëtare dhe zonat rurale.

Hekurudhat- Brenda muajve të parë do të vëmë në funksionim stacionin e përbashkët të Tuzit, me Malin e Zi.Provë e parë e komunikimit ndërhekurudhor me një doganë të vetme. Brenda muajve të parë do përgatisim një masterplan për një sistem transporti të shpejtë hekurudhor për udhëtarë. Hekurudha e shpejtë Tiranë-Rinas, e cila do bëhet realitet në këto katër vite.Do punohet për projektin e lidhjes së Shqipërisë, Kosovës dhe Maqedonisë.Do punohet dhe për fizibilitetin e lidhjes hekurudhore me Greqinë.

Transporti detar- Ristrukturimin e infrastrukturës portuale. Do shmangim procedurat burokratike, kryesisht nga kapiteneritë e porteve me synim tërheqjen e turizmit elitar.

Transporti ajror- Gjatë katër viteve të ardhshme qeveria angazhohet për avancimin e projekteve të ndërtimit infrastrukturor aeroportual të jugut, sidomos aeroporti i Vlorës dhe të përfundojmë studimin për aeroportin turistik të Sarandës.Me një PPP ka shumë logjikë ekonomike.

Sistemi i Ujësjellës Kanalizimeve- Ka qenë dështim i madh për shkak të keqmenaxhimit nga autoritetet lokale.Nuk mund të kemi më financime politike apo financime pa treguar perfomancë ujësjellësat. Nuk mund të kemi Ujësjellësa që vetëm kërkojnë lekë ndërkohë nuk kapin asnjë parametër. Vjedhje masive e ujit.Jo vetëm do fillojmë operacion kundër lidhjeve të paligjshme, por dhe do financohen në bazë të performancës.

Energjia- Do thellojmë reformën.Në katër vitet e ardhshme rreth 170 milion euro do investohen në kapacitetet aktuale gjeneruese të kaskadës së Drinit. Rinovimin e pajisjeve dhe sigurimin e digave. Në transmetim do investohen mbi 160 milionë euro të tjera.Qeveria do të vazhdojë procesin e ndarjes së OSHEE.Shqipëria përveç prodhimit hidro do të ketë dhe prodhimin e energjisë nga energjia diellore dhe e erës. Shumë shpejt do të zhvillojmë dhe ankandin më të madh së bashku me BERZH për të ngritur impiantin më të madh fotovoltai në Shqipëri, synojmë të paktën 30 megavat.Në planin kombëtar parashikohen dhe 30 megavat me erë. Një synim i joni do të jetë vënia në eficencë i termocentralit të Vlorës, por tashmë të lidhur me rrjetin e gazit.Po përfundojmë studimin e plotë për të filluar koncesionin dhe zgjedhur një PPP.Ndërkohë për investitorët privatë në fushën e energjisë, qeveria do të ndryshojë modelin e kontratave nga BOT në BOO.Duke kaluar në një nivel pronësie të HEC-eve të sotme.