Ministria e Financave: Drafti jo zyrtar, shifrat janë ilustrim

Ministria e Financave përmes një deklarate për shtyp reagoi mbrëmjen e 7 gushtit 2015 lidhur me draftin për tatimin mbi të ardhurat që është dërguar grupeve të interesit për mendim. Sipas saj drafti nuk është definitive dhe shifrat janë ilustrim.
“Varianti i shpërndarë për mendim është jo zyrtar, por në shenjën e vullnetit të bashkëpunimit të mirë me palët e interesuara për të fituar kohë pasi javën e parë të shtatorit ne duhet të vazhdojmë dialogimin me ekspertin e FMN. Në të gjithë draftin dhe jo vetëm në nenin 25, shifrat dhe disa nga konceptet e reja janë vendosur gjithmonë në kllapa dhe në germa korsive për të dalluar faktin që ato janë thjesht ilustrime. Koincidenca e përputhjes me disa nga ato që.përdoren aktualisht, është keqkuptuar duke dhënë shkas për spekulim.
E vërteta është qe ministria e Financave po përgatit një ligj të ri për tatimin mbi të ardhurat duke shfuqizuar legjislacionin ekzistues të mbingarkuar nga ndryshimet e shumta në vite dhe për të pasur në një ligj tatimin mbi të ardhurat personale dhe tatimin mbi fitimin.
Asnjë diskutim dhe asnjë vendimmarrje nuk ka në lidhje me mundësinë e ndryshimit të skemës aktuale të tatimit progresiv mbi të ardhurat personale. Kur projekt ligji do të dërgohet zyrtarisht për mendim, do të jetë gjithë hapësira e duhur dhe transparenca maksimale për diskutim” thuhet në njoftim.