Ministrja çon në Prokurori drejtorin e shkollës, presion dhe kërcënoi

Ministrja teknike e Arsimit Mirela Karabina ka çuar në prokurori një tjetër drejtues të arsimit. Referuar njoftimit zyrtar, ku thuhet se Ministrja ka kallëzuar në Prokurorinë e Lushnjës drejtorin e shkollës 9-vjeçare në fshatin Çermë.

Sipas Ministrisë, Agim Maçi ka marrë pjesë në fushatë dhe për më tepër ka ushtruar presion mbi mësuesit e shkollës së tij për t’i detyruar të votojnë për një subjekt politik.

“Ministrja e Arsimit dhe Sportit (MAS) mbi bazën e informacionit të depozituar ka përcjellë sot pranë Prokurorisë së Rrethit Gjyqësor Lushnjë për Drejtorin e shkollës 9-vjeçare, në fshatin Çermë e Sipërme Lushnjë, z. Agim Maçi”,thuhet në deklaratën e Ministrisë.

Më teh theksohet se z. Maçi, është angazhuar në fushatën zgjedhore në kundërshtim me përcaktimet ligjore, duke shkelur kështu etikën e drejtuesit të një institucioni arsimor. Më tej MAS, ka bërë me dije se “drejtori ka ushtruar presion duke kërcënuar me vendin e punës mësuesit e shkollës së tij për t’i detyruar të votojnë për një subjekt politik në kundërshtim me përcaktimet ligjore të Vendimit të Këshillit të Ministrave nr. 473, datë 01.06.2017.

Gjithashtu nga ana e MAS është përcjellë pranë drejtuesit të Zyrës Arsimore Lushnjë, kërkesa për vijimin e procedurave disiplinore.