Mishel Platini: Blatter doli gënjeshtar, FIFA-s i duhet lider i ri

Këtë javë votohet për kreun e FIFA-s. A do të jetë sërish Sepp Blatter në krye të saj apo Princi Ali që ka mbështetjen e të gjithë atyre që janë bashkuar në një front të vetëm kundër zviceranit, mbetet për t’u parë në votimin e 29 majit. Në të shkuarën Platini ka qenë pro tij, por tani presidenti i UEFA-s argumenton se ka ardhur koha që në drejtimin e FIFA-s “të fryjë një erë e re”, edhe pse Blatter e ka të vështirë të shkëpusë rrënjët pas 4 mandatesh. – “E kam bërë të ditur edhe më parë pozicionin tim. E kam thënë se FIFA-s i duhet një lider i ri”.

Blatter kërkon mandatin e radhës 4-vjeçar, pavarësisht se në 2011-ën tha se ai do të ishte i fundit. Për Platini, kjo është pa dyshim një gënjeshtër nga ana e zviceranit. – “Ai dëshiron të qëndrojë jo sepse ka punë të pambaruara, por sepse ka frikë nga e ardhmja larg FIFA-s. E kuptoj boshllkëkun që mund të ndiejë, është njerëzore. Nga ana tjetër, unë shpresoj dhe kam bindjen se Princi Ali, të cilin e njoh prej vitesh, do të ishte një president i mirë për FIFA-n”.  Pavarësisht kritikave nga Platini dhe figura të tjera të rëndësishme, Blatter ka mbështetje të fortë nga Afrika e Azia dhe sipas të gjitha gjasave do të rizgjidhet pa vështirësi në krye të qeverisë botërore të futbollit.