Monument për “vrasësin” e miliona njerëzve në botë!

Mikhail Kallashnikov, inxhinieri i njohur i armëve ruse, është përjetësuar me një shtatore në qendër të Moskës.

Arma Kallashnikov është sot ndër më të përhapurat në botë dhe grupet kriminale veçanërisht e zotërojnë atë. Pushka sulmuese e njohur ndryshe si Ak-47, mendohet të jetë arma që është prodhuar më së shumti në botë.

Figura prej bronzi e inxhinierit prej pesë metrash në këmbë në një piedestal prej katër metrash u paraqit në publik në një ceremoni të martën.

Skulptori Savlat Sherbakov, i cili krijoi monumentin, tha se donte që puna e tij të përfaqësonte një betejë midis së mirës dhe së keqes, siç i përshtatet një njeriu, puna e jetës së të cilit ishte një instrument vdekjeje.

Ekzistojnë rreth 100 milionë pushkë AK-47 që janë aktualisht në përdorim dhe arma është bërë kaq e dukshme në disa zona konflikti, saqë ka hyrë në simbolet shtetërore të disa kombeve afrikane.

Kalashnikov, i cili vdiq në vitin 2013 në moshën 95 vjeçare, gjithmonë ka këmbëngulur se arma që kishte projektuar ishte një mjet për të mbrojtur atdheun e tij dhe jo për të sjellë vdekje.

Realiteti tregon të kundërtën.

Mikhail ishte komandant i tankeve gjatë Luftës së Dytë Botërore, ndërsa filloi karrierën e tij si projektues i armëve pas një dëmtimi në shpatull gjatë Betejës së Bryansk.

Teksa ishte në spital në vitin 1942, dëgjoi ushtarët e plagosur duke u ankuar për pushkën sovjetike dhe vendosi të ndryshonte rrugën e karrierës së tij.

Arma e parë e Kalashnikov u prodhua në vitin 1947, duke sjellë krijuesit Çmimin Stalin dhe Urdhrin e Yllit të Kuq.

AK-47 ka qenë arma standarde e ushtrisë sovjetike dhe pastaj ruse që nga viti 1949.