Moody`s paralajmëron për motin: Kërcënon rritjen ekonomike dhe forcën fiskale

Kushtet ambientale, që i referohen gjerësisht atyre atmosferike, janë aktualisht kërcënimi më i madh që i kanoset ekonomisë shqiptare.

Këtë gjë e thekson edhe agjencia prestigjioze e vlerësimit Moody`s, në raportin e zgjeruar për Shqipërinë, që shoqëron vendimin për të mbajtur të pandryshuar vlerësimin për borxhin, të siguruar ekskluzivisht nga Scan.

Në raportin e bërë publik, Moody`s flet për rrezik, për shkak të varësisë së madhe të ekonomisë shqiptare ndaj sektorit bujqësor, që zë 23% të prodhimit të brendshëm bruto, ndërsa në raportin e zgjeruar, saktëson me detaje se si mund të impaktojë moti ekonominë.

Kërcënimi numër një vjen pikërisht nga thatësira, periudhë të cilën Shqipëria po kalon aktualisht. “Profili i kreditit të Shqipërisë është i ekspozuar ndaj rreziqeve ambientale, duke marrë parasysh rëndësinë e sektorit bujqësor, por edhe varësinë e plotë të sektorit energjetik ndaj burimeve hidrike, nënvizon Moody`s.

“Për këtë arsye, defiçiti i energjisë elektrike mund të prodhojë një impakt negativ në rritjen ekonomike si dhe të çojë në importe të shtrenjta të energjisë”, thotë më tej raporti.

Moody`s vlerëson një rritje ekonomike të vendit tonë pranë 3.6% për këtë vit, dhe situata e rëndë që po kalon vendi si pasojë e thatësirës, mund të ndikojë në një rritje më të dobët ekonomike.

Në një prej katër shtyllave mbi të cilat ndërtohet edhe profili i borxhit të Shqipërisë, atë të forcës fiskale, agjencia flet për një rrezik që buron po ashtu nga kushtet atmosferike.

“Në veçanti, rreziqet kryesore fiskale të Shqipërisë lidhen me importet e lidhura me motin të energjisë elektrike”, thuhet më tej në raport.

Forca fiskale, është një ndër shtyllat që merr edhe vlerësimin më pozitiv nga Moody`s, por edhe agjenci të tjera vlerësimi, më shumë për shkak të progresit, se sa për shkak të situatës aktuale.