Mustafaj: Basha nuk ka ngrirë, po përdor PD-në

Besnik Mustafaj, ka deklaruar ditën e sotme se është koha që brenda Partisë Demokratike të ulen tensionet dhe se duhet të kuptohet se grupi kritik kundër Bashës është një faktor brenda PD-së.

“Ajo që e quani grupi kundër Bashës është tashmë një faktor në PD. Janë figura me autoritet politik, të rinj dhe të vjetër si të thuash. Kështu që në këtë kuptim është absolutisht e domosdoshme të gjendet çelësi për uljen e këtij tensioni”, u shpreh Mustafaj në një prononcim për TV Klan.

Sipas Mustafaj-t  përgjegjës për klimën e krijuar brenda kësaj force politike është Basha, pasi sipas tij ka një seri veprimesh që tregojnë se Basha nuk ka ngrirë por është shumë aktiv.

“Po përdor selinë e partisë, po përdor zyrën e tij, gjithë infrastrukturën, sekretariatin, makinën telefonin e partisë, zyrën e shtypit, gazetën e partisë për të ushtruar ndikimin e vet mbi zgjedhjet e ardhshme”, deklaroi Mustafa.

Mustafa ka shtuar se grupimi kritik ndaj kreut të PD-së, Lulzim Bashës, duhet të dali me një kandidaturë që të mishërojë alternativën e tyre.

Ndërkohë afati i fundit për dorëzimin e kandidaturave sipas vendimit të firmosur nga dy nënkryetarët e kësaj force politike përfundon ditën e diel, dhe një mbledhje kryesie pritet të caktojë dy komisionin që do të menaxhojë administrimin e procesit zgjedhor.