Ndotja në Shqipëri, e lartë – KLSH: Raportet për ajrin, besueshmëri të ulët

Normat e ndotjes së ajrit në Shqipëri janë më të larta nga çfarë raportojnë autoritetet përkatëse. Konstatimi vjen përmes një Raporti të Kontrollit të Lartë të Shtetit, i paraqitur javës së shkuar, në një takim mes 12 vendeve në Luksemburg. Objektivi kryesor i këtij takimi ishte vlerësimi i masave të ndërmarra për të luftuar ndotjen e ajrit.

Në raportin e tyre, përfaqësuesit e KLSH theksuan ndër të tjera mos akreditimin e procesit të monitorimit të cilësisë së ajrit në vendin tonë, numrin e pakët të stacioneve të monitorimit si dhe besueshmërinë e ulët qe kanë Raportet e Gjendjes së Mjedisit (veçanërisht për cilësinë e ajrit) në Shqipëri.

Ashtu si dhe në vendet e tjera evropiane, ndotësit kryesorë që ndikojnë në përkeqësimin e cilësisë së ajrit ishin thuajse të njëjta, duke filluar me grimcat e imëta (PM10 & PM2.5), oksidet e azotit (NOX), ozoni troposferik (O3), dioksidi i sulfurit (SO2), monoksidi i karbonit etj. Trafiku, shoqëruar me sektorin e industrisë dhe bujqësisë janë gjeneruesit kryesorë të këtyre ndotësve.