Ngjela: Rama ka dështuar. Për Merkelin ai është Kryeministri i disfatave

Spartak Ngjela shprehet se kreu i qeverisë shqiptare Edi Rama nuk ka përmbushur kërkesat e ndërkombëtarëve për reforma. Në një analizë në Facebook, avokati i njohur rendit 4 kushte që Kancelarja Angela Merkel i ka vendosur qeverisë “Rama” për të ecur përpara me integrimin e Shqipërisë në BE.

Ngjela thotë se në takimin e fundit me Merkel, Rama nuk ka paraqitur asnjë arritje për pritshmëritë që kishin gjermanët. Për pasojë, avokati shprehet se Edi Rama shihet si kryeministër i dështuar nga Berlini zyrtar.

Postimi i plotë i avokatit Spartak Ngjela në Facebook:

“Cilat janë disfatat e qeverisë Rama sipas mendimit të politikës gjermane dhe Kancelares Merkel.

Takimi i fundit që pati kryeministri shqiptar në Berlin, ishte shumë i ftohtë; dhe kjo sepse gjermanët e kuptuan që kishin të bënin me një kryeministër që thoshte vetëm fjalë pa lidhje.

Në funksion të kësaj Angela Merkel i dha këtë konkluzion:

Qeveria Rama nuk ka mundur të realizojë:

1. Reformën në drejtësi.
2. Zgjidhjen e problemit të pronave ( as e ka filluar).
3. Ndarjen territoriale në formë federale me pavarësi të plotë ekonomiko-politike.
4. Ristrukturim i sistemit arsimor në drejtim të intelektit dhe prodhimit të punëtorëve të kualifikuar.
5. Sistemi shëndetësor kërkon ristrukturim të plotë në mënyrat e financimit….

Të katra këto janë prioritete që duhet të formojnë Shqipërinë për të qenë e gatshme për në Bashkimin Europian.

Por, ka mundësi Rama t’i realizojë këto? Rama jo vetëm që nuk ka mundësi t’i realizojë këto, por ai as nuk i dëshiron. Po pse? Reforma në Drejtësi e penalizon.

Zgjidhen e problemit të pronave Rama nuk e kupton dot. Ndarjen territoriale në formë federale, Rama nuk e koncepton dot fare se i duket vetja që mbetet pa pushtet.

Ristrukturimin e sistemit arsimor Rama nuk e di fare se çfarë është.  Mënyrën e financimit të sistemit arsimor, kryeministri nuk arrin ta kuptojë dot fare. Siç shihet kryeministri shqiptar për Perëndimin ka dështuar.

Po shqiptarët çdo të bëjnë?”. 

Ngjela: Ja politikanët e lartë që do të shkojnë në burg nga reforma në drejtësi