Nisin largimet nga kabinetet e ministrave të PD, japin dorëheqjen dy këshilltarët e Demirajt

Nisin largimet e para nga kabinetet e ministrave të Partisë Demokratike në qeverinë “Rama”. Dy këshilltarë të ministrit teknik të Punëve të Brendshme, Dritan Demiraj, kanë dhënë dorëheqjen ditën e sotme.

Burime për “BalkanWeb” bëjnë me dije se ata janë Muhamet Rrumbullaku dhe Aleks Hajdari.

Të njëjtat burime pohojnë se motivet e dorëheqjes së dy këshilltarëve të ministrit të Brendshëm lidhen pikërisht me faktin se tashmë detyra e tyre “de facto” ka përfunduar dhe se për këtë arsye kanë vendosur të angazhohen në aktivitetet e tyre personale.

Këto janë largimet e para nga institucionet e drejtuara nga ministrat e PD, pas zgjedhjeve parlamentare të 25 qershorit. Ndërkohë që vlen të theksohet se asnjë prej ministrave teknikë nuk është larguar nga detyra.