ONM kompromenton procesin e vetingut: Dy standarde për konfliktin e interesit

Operacioni Ndërkombëtar i Monitorimit (ONM) që ka monitoruar të gjithë listat e kandidatëve që aplikojnë për institucionet e vetingut, siç u konstatua nga komisioni parlamentar ka aplikuar dy standarde kur është fjala për konfliktin e interesit!

Ka penalizuar për këtë shkak emrat e juristëve të njohur, me përvojë dhe integritet si: Erin Çaku, Kestrin Katro, Monika Meça, Nejla Peka, Rezarta Abdiu dhe Shqipe Halilaj, sepse dikush ka vëllanë, motrën, apo burrin që punon aktualisht në sistemin e drejtësisë, ndërkohë që megjithëse kanë të njëjtin shkak, më saktë kanë burrin në sistemin e drejtësisë, nuk ka penalizuar dy konkurente të tjera si: Fatmira Luli dhe Aldona Sylaj. Zonja Luli ka bashkëshortin prokuror në Apelin e Durrësit (Kujtim Luli).

Ky qëndrim me dubël-standard nga ana e ONM-së ka ndezur debatet në komisionin parlamentar dhe ka evidentuar edhe subjektivizmin e ekspertëve të këtij organizmi ndërkombëtar. Shumë prej aplikantëve kanë argumentuar dhe kanë paraqitur dokumenta që provojnë njëanshmëri dhe subjektivizëm edhe nga ana e ONM-së. Komisioni sot do të shqyrtojë dosjet dhe materialet shtesë që kanë paraqitur aplikantët dhe do të mblidhet për të marrë vendim nesër në ora 10.