Panariti: Maqedonia, luftë politike me kastravecët shqiptarë

Ministri i Bujqësisë, Edmond Panariti,  ka reaguar pas deklaratave të zëvendës-ministrit të Bujqësisë maqedonas, Lupço Nikolovski, i cili tha se në tregun e Maqedonisë kanë hyrë nga Shqipëria kastravecë që përmbajnë substanca helmuese.

Panariti theksoi se në Maqedoni po përdoren kastravecët tonë për luftë politike.

“Është ndezur lufta politike atje dhe po përdoren kastravecët e Shqipërisë për këtë luftë. Sipas rezultateve laboratorike në Shkup, nivelet e pesticideve janë 25 herë më të ulta se niveli maksimal i lejuar. Kemi marrëveshje me Maqedoninë që për çdo shqetësim, autoritetet duhen njoftuar paraprakisht dhe jo me masa ekstreme si ndalimi i kamionëve në doganë”, u shpreh Panariti.

“Është veprim i nxituar dhe i pajustifikuar. Perimet tona janë super të pastra”, shtoi ministri i Bujqësisë.Edhe drejtuesja e laboratorit maqedonas që ka bërë analizat, Suzana Kratovalieva tha se, niveli i pesticideve te kastravecët shqiptarë është shumë më i ulët nga sa është i lejuar me ligj.

“Niveli, në të cilin mund të përcaktohet sasia e pjesës së mbetur të pesticideve, është 0,01 miligramë në 1 kg. Në rastin konkret, në mostrat e sjella nga kabineti i zv.ministrit plotësues, Lupço Nikolovski, është gjetur sasi prej 0,02 miligramë në 1 kg mbetje nga substanca aktive metalaksil, kurse niveli maksimal i lejuar, sipas bazës së të dhënave europiane është 0,5 miligramë në 1 kg”, tha Suzana Kratovalieva, drejtore e Laboratorit shtetëror Fitosanitar.

Shqipëria pritet të paraqesë ankesë për shkelje të konventave ndërkombëtare nga ana e Maqedonisë dhe përdorimin e luftës së brendshme politike për luftë tregtare me fqinjët.